Navi Mumbai: सुरक्षा रक्षकाच्या बुटातून निघाला कोब्रा, फणा काढून बाहेर आला अन्...; पाहा खतरनाक VIDEO

विकास मिरगणे, नवी मुंबई

नवी मुंबईमध्ये सुरक्षा रक्षकाच्या बुटातून कोब्रा साप निघाल्याची घटना समोर आली. हा कोब्रा साप बुटामध्ये लपून बसला होता. हा सुरक्षारक्षक बूट घालायला गेला तेवढ्यात त्याला बुटामध्ये काही तरी असल्याचे कळाले. त्याने सर्पमित्राला बोलावून घेतलं. या कोब्रा सापाचा व्हिडीओ समोर आला असून तो व्हायरल होत आहे. सर्पमित्राने कोब्राला रेस्क्यू करून जंगलात नेऊन सोडलं.

मिळालेल्या माहितीनुसार, नवी मुंबईतील महापे एमआयडीसी क्षेत्रात एक थरारक घटना समोर आली आहे. येथील एका कंपनीत सुरक्षारक्षक म्हणून काम करणाऱ्या व्यक्तीच्या बुटात कोब्रा साप आढळला. सुरक्षा रक्षकाने बूट घालण्यासाठी घेतला. बूट घालताना त्याला आतमध्ये अचानक काही हालचाल जाणवली. त्यानंतर त्याने तात्काळ सावधगिरी बाळगत सर्पमित्राला संपर्क केला.

सर्पमित्राने त्वरित घटनास्थळी धाव घेत सावधपणे आणि कौशल्याने कोब्रा सापाचे रेस्क्यू केले. हा साप विषारी कोब्रा जातीचा होता. सुदैवाने सुरक्षा रक्षकाला कोणतीही इजा झाली नाही आणि वेळीच हस्तक्षेप झाल्यामुळे एक मोठा अनर्थ टळला. या प्रकारामुळे परिसरात भीतीचे वातावरण पसरले असून हा साप नेमका कसा आणि कुठून आला याबाबत प्रशासनाकडून तपास सुरू आहे.

या व्हिडीओमध्ये दिसत आहे की, जेव्हा सर्पमित्राने या कोब्रा सापाला रेस्क्यू करण्यासाठी कपाटा खाली असलेला बूट बाहेर काढला. तेव्हा हा कोब्रा साप फणा काढून बाहेर आला. त्यानंतर तो बुटातून बाहेर पडत पळून जाऊ लागला. सर्पमित्राने त्याला रेस्क्यू केले आणि जंगलामध्ये नेऊन सोडून दिले. पावसाळा असल्यामुळे सरपटणारे प्राणी अनेक ठिकाणी लपून बसतात. त्यामुळे नागरिकांनी सतर्क राहवे असे आवाहन करण्यात येत आहे.