Narali Purnima 2024 : सन आयलाय गो...! कोळी बांधवांकडून नारळी पौर्णिमेचा सण दणक्यात साजरा, जाणून घ्या दिवसाचे महत्त्व

अभिजीत देखमुख, साम टीव्ही प्रतिनिधी

कल्याण : कल्याण, अंबरनाथमधील कोळी बांधवांनी नारळी पौर्णिमेचा सण दणक्यात साजरा केला. कोळी बांधवांनी पारंपारिक वेशभूषेत शोभायात्रा काढत दर्याला नारळ अर्पण करत सण साजरा केला. यावेळी परिसरातील ग्रामस्थ आणि कोळी बांधवांनी भव्य मिरवणूक देखील काढली. या मिरवणुकीत लहानांपासून ज्येष्ठ मंडळींनी हजेरी लावली.

नारळी पौर्णिमेनंतर मासेमारी सुरु होत असल्याने कोळी समाजात नारळी पौर्णिमेच्या उत्सवाला विशेष महत्व आहे. नारळी पौर्णिमेनिमित्त कोळी बांधव दरवर्षी पारंपारिक वेशभूषेत शोभायात्रा काढतात. या शोभायात्रेत दर्याला नारळ अपर्ण करत शांत होण्याचे आवाहन करतात. कल्याण पूर्वेकडील नांदिवली परिसरातील ग्रामस्थ,कोळी बांधवानी पारंपारिक वेशभूषेत भव्य मिरवणूक काढली.

या शोभायात्रेत मोठ्या उत्साहात कोळी बांधवांनी सहभाग घेतला होता. या मिरवणुकीत लहान मुलांसह,तरुण वृद्ध नागरिक, महिला मोठ्या प्रमाणात सहभागी झाले होते. कोळी बांधवांनी मिरवणूकीत वाजत गाजत तलावात नारळ अपर्ण करत सण साजरा केला. कल्याण पश्चिममध्येही आगरी कोळी उत्कर्ष समितीतर्फे देखील मिरवणूक काढण्यात आली होती.

अंबरनाथमध्येही नारळी पौर्णिमा उत्सव साजरा

अंबरनाथमध्येही पाटील कोळी समाजातर्फे नारळी पौर्णिमा सण उत्साहात साजरा करण्यात आला. अंबरनाथमधील प्राचीन शिवमंदिराच्या  प्रांगणात नारळाची भव्य मिरवणूक काढण्यात आली. यावेळी माजी नगरसेवक आणि शिव मंदिराचे पुजारी विजय पाटील यांच्यातर्फे ही मिरवणूक काढण्यात आली.

या मिरवणुकीतील पाटील कोळी समाज प्राचीन शिवमंदिराचा पुजारी समजला जातो. हा समाज या मिरवणुकीत मोठ्या प्रमाणात सहभागी झाला होता. शिव मंदिराला मिरवणुकीचे दोन फेरे घेऊन शेजारीच असलेल्या वालधूनी नदीत नारळ विसर्जित करण्यात आला.