नुपूर शर्मांच्या अडचणीत वाढ; मुंब्रा पोलिसांचे समन्स

मुंबई: भारतीय जनता पक्षाच्या (BJP) निलंबित प्रवक्त्या नुपूर शर्मा यांच्या अडचणीत वाढ झाली आहे. मुंब्रा पोलिसांनी त्यांना समन्स बजावले आहे. २२ जून रोजी त्यांना चौकशीसाठी हजर राहण्याचे आदेश दिले आहेत. प्रेषित मोहम्मद यांच्यावरील वादग्रस्त वक्तव्य केल्याच्या आरोपावरून त्यांना भारतीय जनता पक्षातून निलंबित करण्यात आले आहे.

नुपूर शर्मा यांच्या विरुद्ध मुंबईतील पायधुनी, ठाणे शहरातील मुंब्रा, पुणे येथे गुन्हा दाखल करण्यात आले आहेत. नुपूर शर्मा आणि त्यांच्या कुटुंबियांना दिल्ली पोलिसांनी सुरक्षा पुरवण्याचा निर्णय घेतला आहे. शर्मा यांना जीवे मारण्याच्या धमक्या आल्या आहेत. या संबंधी त्यांनी दिल्ली पोलिसांत (Police) अज्ञाताविरोधात गुन्हा दाखल केला आहे.

प्रेषित मोहम्मद यांच्याबद्दल केलेल्या कथित वादग्रस्त वक्तव्यावर भारतासह आखाती देशांकडूनदेखील तीव्र शब्दांत निषेध व्यक्त करण्यात आला आहे. दरम्यान नुपूर शर्मा यांना मुंब्रा पोलिसांनी २२ जून रोजी चौकशीसाठी हजर राहण्याचे आदेश देण्यात आले आहेत.