Mumbai : मुंबईत वाहतुकीत मोठे बदल; १३ ते २० सप्टेंबरदरम्यान प्रमुख मार्गांवर निर्बंध, जाणून घ्या पर्यायी मार्ग

मुंबईकरांनो १३ सप्टेंबर ते २० सप्टेंबर पर्यंत वांद्रे परिसरात प्रवास करत असाल तर ही महत्त्वाची बातमी तुमच्यासाठी. माउंट मेरी यात्रेनिमित्त यंदा १३ ते २० सप्टेंबरदरम्यान मोठ्या संख्येने भाविक माउंट मेरी चर्चला भेट देण्याची शक्यता आहे. यात्रेच्या काळात माउंट मेरी परिसरासह वांद्रे वाहतूक विभागातील प्रमुख रस्त्यांवर मोठ्या प्रमाणात गर्दी होण्याची शक्यता आहे. ही शक्यता लक्षात घेता वाहतूक पोलिसांकडून विविध वाहतूक बदल लागू करण्यात आले आहेत. वाहनचालकांनी पोलिसांच्या सूचनांचे पालन करून सहकार्य करावे, असे आवाहन करण्यात आले आहे.

यात्रेच्या कालावधीत माउंट मेरी रोड सकाळी ६ ते रात्री ११ वाजेपर्यंत स्थानिक रहिवाशांची वाहने, पोलीस वाहने आणि आपत्कालीन सेवांची वाहने वगळता इतर सर्व वाहनांसाठी बंद राहणार आहे. केन रोडवरही वाहतूक व्यवस्थेत बदल करण्यात आला आहे. माउंट मेरी रोडपासून पुढे बी. जे. रोडपर्यंत स्थानिक पासधारक रहिवाशांची वाहने आणि आपत्कालीन वाहने वगळता इतर वाहनांसाठी हा वनवे असेल. त्यामुळे बी. जे. रोडकडून केन रोडवर प्रवेश करता येणार नाही. त्याचप्रमाणे परेरा रोड पूर्वेकडून पश्चिमेकडे जाण्यासाठी वनवे करण्यात आला असून, बी. जे. रोडकडून या मार्गावर प्रवेश बंद असेल. सेंट जॉन बॅप्टिस्ट रोड स्थानिक रहिवाशांची वाहने आणि आपत्कालीन वाहने वगळता इतर सर्व वाहनांसाठी बंद ठेवण्यात येणार आहे.

अवजड वाहनांना प्रवेशबंदी

यात्रेच्या काळात सकाळी ६ ते रात्री ११ या वेळेत काही प्रमुख मार्गांवर अवजड वाहनांना प्रवेशबंदी राहणार आहे. यामध्ये के. सी. मार्ग, बॅपेल रोड, सेंट जॉन बॅप्टिस्ट रोड, सेंट सेबॅस्टियन रोड, माउंट कार्मेल रोड, माउंट मेरी रोड, बी. जे. रोड आणि केन रोड यांचा समावेश आहे.

'या' मार्गांवर 'नो पार्किंग'

वाहतूक सुरळीत ठेवण्यासाठी माउंट मेरी रोड, परेरा रोड, केन रोड, हिल रोडवरील सेंट पॉल रोड ते मेहबूब सर्कल परिसर, माउंट कार्मेल रोड, बॅपेल रोड, सेंट जॉन बॅप्टिस्ट रोड, सेंट सेबॅस्टियन रोड, रिबेलो रोड आणि डॉ. पीटर डायस रोड येथे नो-पार्किंग लागू करण्यात आले आहे. यात्रेसाठी येणाऱ्या भाविकांनी शक्यतो सार्वजनिक वाहतुकीचा वापर करावा तसेच वाहनचालकांनी पर्यायी मार्गांचा वापर करून वाहतूक पोलिसांना सहकार्य करावे, असे आवाहन करण्यात आले आहे.