Water Cut: पाणी जपूनच वापरा! मुंबई-ठाण्यात पाणीकपातीचे संकट, वाचा कधी अन् कोणत्या भागात पाणीबाणी?

Summary -

• मुंबईत भांडुप जलवाहिनी दुरुस्तीचे काम सुरू आहे

• मुंबईतील अनेक भागात १५ टक्के पाणीकपात करण्यात आली

• कुलाबा ते दहिसर आणि कुर्ला–भांडुपपर्यंत अनेक विभाग पाणीकपात

• ठाण्यात जलवाहिनीचे काम सुरू असल्याने ३० टक्के पाणीकपात

• पुढील ३ दिवस शहरातील अनेक भागात पाणीबाणी असेल

मुंबई आणि ठाण्यामध्ये राहणाऱ्या नागरिकांनी महत्वाची बातमी आहे. या शहरातील अनेक भागात पाणीकपात करण्यात आली आहे. मुंबईमध्ये एक दिवस आणि ठाण्यामध्ये ३ दिवस पाणीकपात करण्यात आली आहे. नागरिकांनी याची नोंद घेत पाण्याचा जपून वापर करावा असे आवाहन पालिकांकडून करण्यात आले आहे. मुंबईत १५ टक्के तर ठाण्यात ३० टक्के पाणी कपात करण्यात आली आहे. मुंबई आणि ठाण्यात कधी आणि कोणत्या दिवशी पाणीकपात असणार आहे हे आपण जाणून घेणार आहोत...

भांडुप येथील जलशुद्धीकरण केंद्रास पाणी पुरवठा करणारी जलवाहिनी बदलण्याचे काम मुंबई महानगर पालिकेच्या वतीने घेण्यात आले आहेत. त्यामुळे सोमवारी सकाळी १० वाजल्यापासून ते २४ तासांसाठी मुंबईतील अनेक भागात १५ टक्के पाणी कपात करण्यात आली आहे. मुंबईमधील एकूण २५ प्रशासकीय विभागांपैकी १७ विभागांमध्ये पाणी कपात लागू करण्यात आली आहे. मुंबईतील कुलाबापासून ते दादर, माहीम, वांद्रे, अंधेरी, मालाड ते दहिसर, कुर्ला ते भांडुप या भागांमध्ये पाणीकपात असणार आहे.

तर दुसरीकडे ठाणे शहरातील अनेक भागात पुढचे ३ दिवस ३० टक्के पाणीकपात असणार आहे. ठाणे शहराला पाणीपुरवठा करणाऱ्या पिसे बंधारा येथून टेमघर जलशुद्धीकरण केंद्राकडे पाणी वाहून आणणारी १००० मिमि व्यासाची जलवाहिनी कल्याण फाटा येथे महानगर गॅसच्या कामांमध्ये शनिवार ६ डिसेंबर २०२५ रोजी सकाळी नादुरुस्त झाली आहे. पाणीपुरवठा विभागामार्फत जलवाहिनीच्या दुरुस्तीचे काम मागील दोन दिवसांपासून सुरू आहे. परंतु जलवाहिनी जुनी आणि प्रिस्ट्रेस काँक्रीट पद्धतीची असल्यामुळे दुरुस्तीच्या कामासाठी आणखी तीन दिवस वेळ लागण्याची शक्यता आहे.

या कारणास्तव ठाणे शहराकडे येणारा पाणीपुरवठा कमी झाला असून शहरांमध्ये ३० टक्के पाणीकपात करण्यात आली आहे. ठाण शहरामध्ये पाणी वितरणाचा समतोल ठेवण्यासाठी ११ डिसेंबर २०२५ पर्यंत झोनिंग पद्धतीने पाणीपुरवठा करण्यात येणार आहे. यामुळे नागरिकांना कमी प्रमाणात आणि अनियमित पाणीपुरवठा होईल. नागरिकांनी पाण्याचा वापर जपून करावा आणि महापालिकेत सहकार्य करावे असे आवाहन पाणीपुरवठा विभागामार्फत करण्यात येत आहे.