Mumbai Water Shortage : मुंबईत २ दिवस पाणीपुरवठा बंद राहणार; कुठे कमी दाबाने तर कुठे पूर्णपणे बंद? जाणून घ्या

मुंबईत भूमिगत बोगदा शाफ्ट जोडणीसाठी ३००० मिलीमीटर जलवाहिनीवर २५०० मिलीमीटर जलवाहिनीची छेद जोडणी कार्यवाही हाती घेण्यात आली आहे. यामुळे मुंबईतील ११ विभागांमध्‍ये सोमवार, दिनांक १ डिसेंबर २०२५ रोजी सकाळी १० वाजेपासून मंगळवार दिनांक २ डिसेंबर २०२५ रोजी दुपारी ४ वाजेपर्यंत पाणीपुरवठा कमी दाबाने, तर काही विभागांचा पाणीपुरवठा पूर्णतः बंद राहणार आहे.

मुंबईतील घाटकोपर (पूर्व) येथील छेडा नगर जंक्शन परिसरात असलेल्या ३००० मिलीमीटर व्यासाच्या मुख्य जलवाहिनीला अमर महल बोगदा शाफ्टशी जोडणाऱ्या २५०० मिलीमीटर व्यासाच्या जलवाहिनी छेद जोडणी करण्यात येणार आहे. १ डिसेंबर रोजी १० वाजेपासून ते दुसर्‍या दिवशी दुपारी ४ वाजेपर्यंत म्‍हणजेच एकूण ३० तास हे कामकाज करण्‍यात येणार आहे.

पालिकेच्या कामकाजामुळे शहर विभागातील ए, बी, सी, ई, एफ दक्षिण, एफ उत्‍तर विभाग आणि पूर्व उपनगरातील एम पूर्व, एम पश्चिम, एल, एस व एन विभागाचा पाणीपुरवठा प्रभावित होणार आहेत. या कालावधीत मुंबईतील काही विभागात पाणीपुरवठा कमी दाबाने होईल. तसेच काही विभागांचा पाणीपुरवठा बंद राहणार आहे.

पालिकेच्या जलवाहिनीच्या कामामुळे एकूण १४ प्रशासकीय विभागांतील पाणीपुरवठ्यात १५ टक्के कपात करण्याचा निर्णय घेण्यात आला आहे. त्यामुळे या भागातील नागरिकांना जपून पाणी वापरावे लागणार आहे. पालिका प्रशासनाने आवाहन करताना म्हटलं की, नागरिकांनी या कालावधीसाठी पाण्याचा आवश्यक साठा करावा. पाणी कपातीच्या कालावधीत काटकसरीने पाणी वापरुन सहकार्य करावं'.