दानपेटी भरल्यानंतर बोटाच्या कैचीने पैसे काढायचे; मुंबईतील सिद्धिविनायक मंदिरात ८०,००० रुपयांची चोरी, ८ जणांना अटक

राज्याच्या राजधानी मुंबईमध्ये असलेल्या कोट्यवधी भाविकांचे श्रद्धास्थान सिद्धिविनायक मंदिरामधून कर्मचाऱ्यांनीच चक्क दानपेटीतील पैशांवर डल्ला मारण्याची घटना दोन दिवसापूर्वी समोर आली होती. मंदिराच्या सुरक्षेसाठी आणि व्यवस्थापनासाठी नेमलेल्या एका कर्मचाऱ्यानेच चोरी केल्याचे आढळले होते. यामुळे मंदिर परिसरात एकच खळबळ उडाली होती. आता या प्रकरणात अधिक माहिती पोलीस प्रशासनाकडून प्राप्त झाली आहे.

मुंबईतील सिद्धिविनायक मंदिर येथे धक्कादायक प्रकार उघडकीस आला असून मंदिरातील काही कर्मचाऱ्यांनीच संघटित पद्धतीने चोरी केल्याचे समोर आले आहे. या प्रकरणात पोलिसांनी आतापर्यंत एकूण ८ जणांना अटक केली आहे. मिळालेल्या माहितीनुसार, मंदिरातील दानपेटी भरल्यानंतर ती दुसऱ्या खोलीत नेली जात असताना आरोपी कर्मचारी बोटाच्या कैचीच्या साहाय्याने त्यातून पैसे काढत होते. ही चोरी एक-दोन वेळा नव्हे, तर मागील दोन महिन्यांपासून सुरू होती. विशेष म्हणजे आरोपी आळीपाळीने चोरी करत आणि नंतर पैसे आपापसात वाटून घेत असल्याची माहिती समोर आली आहे.

या प्रकरणात पोलिसांनी आतापर्यंत सुमारे ८० हजार रुपये हस्तगत केले असून आणखी रक्कम मिळण्याची शक्यता वर्तवली जात आहे. काही आरोपी सध्या पोलीस कोठडीत असून काहींना न्यायालयीन कोठडी सुनावण्यात आली आहे.

अटकेत असलेल्या आरोपींची नावे पुढीलप्रमाणे

राजेंद्र पेंडूरकर

शरद घाडी

समीर शिवलकर

अरविंद काडगे

अनिल राहाटे

पद्माकर आडकर

अभिषेक मुळीक

महेंद्र भाईजे

सदर घटनेमुळे भाविकांमध्ये संताप व्यक्त केला जात असून मंदिर प्रशासनाच्या सुरक्षाव्यवस्थेवरही प्रश्नचिन्ह निर्माण झाले आहे. मुंबई पोलिसांकडून या प्रकरणाचा अधिक तपास सुरू आहे.