Mumbai News: मुंबईत पावसाचा चौथा बळी, चालत्या दुचाकीवर झाडाची फांदी कोसळली; १८ वर्षीय तरुणाचा जागीच मृत्यू

• आरे कॉलनीत चालत्या दुचाकीवर झाडाची फांदी कोसळली

• अपघातामध्ये १८ वर्षीय तरुणाचा मृत्यू

• हसन रझा सय्यद असं तरुणाचे नाव होते

• दुचाक

• मुसळधार पावसामुळे मुंबईतील झाडे कोसळण्याच्या घटनांमध्ये वाढ झाली आहे.

संजय गडदे, मुंबई

मुंबईत गेल्या दोन दिवसांपासून पावसाची जोरदार बॅटिंग सुरू आहे. या पावसामुळे मुंबईकरांचे चांगलेच हाल होत आहे. काही ठिकाणी पाणी साचल्याच्या घटना घडत आहेत. तर मुंबईत अनेक ठिकाणी झाडं कोसळत असल्याच्या घटना घडत आहेत. मुंबईत पावसाने चौथा बळी घेतला आहे. अंगावर झाडाची फांदी कोसळून १८ वर्षीय तरुणाचा मृत्यू झाला. गोरेगावच्या आरे कॉलनीमध्ये ही घटना घडली.

मिळालेल्या माहितीनुसार, आरे कॉलनीत चालत्या दुचाकीवर झाडाची फांदी कोसळून १८ वर्षीय तरुणाचा मृत्यू झाला. शनिवारी दुपारी मुसळधार पावसादरम्यान आरे कॉलनीतील युनिट क्रमांक १३ रस्त्यावर ही दुर्घटना घडली. मृत तरुणाची ओळख हसन रझा जहांगीर आलम सय्यद (१८ वर्षे) अशी पटली आहे. हसन रझा हा साकीनाका परिसरातील रहिवासी होता. मित्रांसोबत दुचाकीवरून जात असताना झाडाची मोठी फांदी त्याच्या डोक्यावर कोसळली.

या घटनेत गंभीर जखमी झालेल्या हसन रझाला उपचारासाठी तात्काळ मलाड पूर्व येथील बाळाजी रुग्णालयात दाखल करण्यात आले. डॉक्टरांनी तपासणीअंती त्याला मृत घोषित केले. या प्रकरणी आरे कॉलनी पोलिस ठाण्यात अपघाती मृत्यूची नोंद करण्यात आली आहे. या घटनेपूर्वी कुर्ल्यामध्ये अंगावर झाड कोसळून ६३ वर्षीय व्यक्तीचा दुर्दैवी मृत्यू झाला. या घटनेचा सीसीटीव्ही व्हिडीओ व्हायरल झाला आहे.

कुर्ल्यातील नौपाडा येथे आज दुपारी पावणे एक वाजण्याच्या सुमारास झाड कोसळले. या घटनेत ६३ वर्षीय व्यक्ती गंभीर जखमी झाली. त्यांना तातडीने जवळील खासगी रुग्णालयात उपचारासाठी दाखल करण्यात आले. त्यांच्यावर तातडीने उपचार करण्यात आले पण त्यांचा उपचारादरम्यान मृत्यू झाला. युनूस कुंडावाला असे मृत्यू झालेल्या व्यक्तीचे नाव होते. या घटनेनंतर स्थानिक आक्रमक झाले असून त्यांनी कारवाईची मागणी केली.

दोन दिवसांपूर्वी साकिनाका येथे मॅनहोलमध्ये पडून एका व्यक्तीचा मृत्यू झाला होता. रस्त्यावरून चालत असताना अचानक उघड्या मॅनहोलमध्ये ही व्यक्ती पडली. या घटनेत ६० वर्षीय व्यक्तीचा दुर्दैवी मृ्त्यू झाला. त्याआधी चेंबूरमध्ये झाड अंगावर कोसळून शाळकरी मुलाचा मृत्यू झाला होता. या चार वेगवेगळ्या घटनांनंतर संतप्त नागरिकांनी मुंबई महानगर पालिकेच्या महापौरांना धारेवर धरलं.