Mumbai Dam Water Level: मुंबईवरील पाणीसंकट कधी दूर होणार?, ७ धरणांमधील पाणीसाठा वाढला; पाहा आजची आकडेवारी

मुंबई शहर आणि उपनगरामध्ये जोरदार पाऊस पडत आहे. कालपासून मुंबईत पावासाचा जोर वाढला आहे. गेल्या काही दिवसांपासून विश्रांती घेतलेल्या पावसाने पुन्हा जोर धरला आहे. मुंबईला पाणीपुरवठा करणाऱ्या सातही धरण क्षेत्रामध्ये चांगला पाऊस पडत आहे. या पावसामुळे धरणांमधील पाणीसाठ्यामध्ये वाढ होताना दिसत आहे. या धरणांमधील पाणीसाठ्यात आज मोठी वाढ झाली आहे. धरणामधील पाणीसाठ्यात वाढ होत असल्यामुळे मुंबईमध्ये सध्या असेलली १० टक्के पाणीकपात आता दूर होण्याची शक्यता आहे.

मुंबई महानगर पालिकेने सोमवारी दिलेल्या माहितीनुसार, मुंबईला पाणीपुरवठा करणाऱ्या सातही धरणांमधील पाणीसाठा ३९.२३ टक्के इतका झाला आहे. १९ जुलै रोजी सकाळी ६ वाजता मुंबईला पाणीपुरवठा करणाऱ्या सातही धरणांमधील पाणीसाठा ५,६७,७७९ दशलक्ष लिटर इतका झाला. म्हणजेच या धरणांमध्ये एकूण ३९.२३ टक्के पाणीसाठा उपलब्ध आहे. मागच्या वर्षी याच दिवशी या धरणांमध्ये ३६.९ टक्के पाणीसाठा उपलब्ध होता.

मुंबई शहराला अप्पर वैतरणा, मोडक सागर, तानसा, मध्य वैतरणा, भातसा, विहार आणि तुळशी या ५ धरण आणि २ तलावांमधून पाणी पुरवठा केला जातो. यासातही धरण आणि तलाव क्षेत्रात गेल्या काही दिवसांपासून चांगला पाऊस पडत आहे. त्यामुळे धरणातील पाणीसाठा वाढत आहे. मुंबईला पाणीपुरवठा करणाऱ्या या सातही धरणांमध्ये १४ लाख ४७ हजार ३६३ दशलक्ष लिटर पाणी साठवण्याची क्षमता आहे. या धरणांमधून मुंबईला दररोज ३ हजार दशलक्ष लिटर पाणीपुरववठा केला जातो. या सातही धरणांमधील पाणीसाठा वाढत असल्यामुळे मुंबईत करण्यात आलेल्या पाणीकपातीचे संकट दूर होण्याची शक्यता आहे. मुंबईमध्ये सध्या ५ ते १० टक्के पाणीकपात आहे.

मुंबईला पाणीपुरवठा करणाऱ्या सातही धरणातील पाणीसाठा -

- अप्पर वैतरणा - ८.७५ टक्के पाणीसाठा

- मोडक सागर - ५७.६६ टक्के पाणीसाठा.

- तानसा - ७४.०१ टक्के पाणीसाठा.

- मध्य वैतरणा - ३६.१४ टक्के पाणीसाठा

- भातसा - ३८.०१ टक्के पाणीसाठा.

- विहार - ५९.७७ टक्के पाणीसाठा.

- तुलसी - ८९.३० टक्के पाणीसाठा.