मुंबईतील 79 नगरसेवकांचं पद अडचणीत; सत्ताधाऱ्यांसह विरोधकांचेही बडे चेहरे अचडणीत

मुंबई महापालिकेत शिवसेनेची २५ वर्षांची सत्ता उलथवून भाजपनं पहिल्यांदाच पालिकेच्या चाव्या आपल्या हातात घेतल्या. परंतु, या निवडणुकांचा धुराळा शांत होतो न होतो, तोच आता महापालिकेत नगरसेवकांच्या विरोधात याचिकांचं वादळ उठलंय. निकालानंतर मुंबई पालिकेच्या विविध प्रभागांमध्ये दाखल झालेल्या निवडणूक याचिकांची अधिकृत माहिती समोर आलीये; आणि ही माहिती मुंबईतील अनेक नगरसेवकांची झोप उडवणारी आहे.

निवडणुकीतील पराभूत उमेदवार आणि सामाजिक कार्यकर्त्यांनी या विजयी नगरसेवकांचं टेन्शन चांगलंच वाढवलंय. या नगरसेवकांविरोधात याचिका दाखल करण्यामागची कारणं काय आहेत ते पाहूयात...

कशामुळे 79 नगरसेवकांचं पद धोक्यात?

निवडणूक प्रक्रियेतील गैरप्रकार

मतमोजणीवरील गंभीर आक्षेप

फेरमतमोजणीची थेट मागणी

उमेदवारी अर्जांबाबत कायदेशीर वाद

निवडणूक नियमांचं उघडपणे उल्लंघन

अशा विविध आरोपांमुळे निवडून आलेल्या नगरसेवकांच्या पदाला थेट ग्रहण लागलंय. विशेष म्हणजे सत्ताधारी आणि विरोधी पक्षांमधल्या बड्या चेहऱ्यांचा यात समावेश आहे. यामध्ये अनेक ज्येष्ठ नगरसेवकांचा समावेश आहे.

मुंबईच्या इतिहासात इतक्या मोठ्या संख्येने निवडणूक याचिका दाखल होण्याची ही पहिलीच वेळ असल्यानं राजकीय वर्तुळात आश्चर्य व्यक्त होतंय. आतापर्यंत केवळ एकाच याचिकेचा निकाल लागलाय. त्यामुळे उर्वरित याचिकांचा निकाल लवकरात लवकर लावण्याची मागणी होतेय.

निवडणुकीनंतर एकाच वेळी ७९ नगरसेवकांच्या वैधतेवर आक्षेप घेण्याची ही आजवरची सर्वात मोठी आणि दुर्मिळ घटना आहे. त्यामुळे मुंबई महापालिकेचं सत्तेचं गणित आणि दिग्गजांचं राजकीय भवितव्य आता पूर्णपणे कोर्टाच्या निकालावर अवलंबून आहे. आणि याच निकालाकडे आता संपूर्ण महाराष्ट्राचं लक्ष लागलंय.