Maratha Reservation: मराठा आंदोलकांचं वादळ आज नवी मुंबईत धडकणार; मनोज जरांगेंचा मुक्काम कुठे असणार?

Manoj Jarange Maratha Andolan

मनोज जरांगे पाटील यांच्या नेतृत्वाखाली २० जानेवारीपासून सुरू झालेली मराठा आरक्षण पदयात्रा आज मुंबईच्या वेशीवर येऊन धडकणार आहे. लोणावळा येथून मोठ्या संख्येने मराठा बांधव नवी मुंबईच्या दिशेने रवाना झाले आहे. यामुळे मोठी वाहतूक कोंडी होण्याची शक्यता आहे. हीच बाब लक्षात घेता शहरात अवजड वाहनांना बंदी घालण्यात आली आहे. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

मनोज जरांगे यांच्यासह लाखो मराठा बांधव (Maratha Reservation) नवी मुंबईतील पोहचणार असल्याने शहरातील वाहतूक व्यवस्थेत बदल करण्यात आला आहे. ही दिंडी नवी मुंबईत आल्यानंतर वाहतूककोंडी होऊ नये यासाठी उद्या जड आणि अवजड वाहनांना शहरात प्रवेशबंदी करण्यात आली आहे.

मराठा समाज आणि मराठा क्रांती मोर्च्याच्या वतीने मनोज जरांगे यांच्यासह मराठा पदयात्रेत सहभागी झालेल्या मराठा बांधवांची राहण्याची व्यवस्था केली जात आहे. त्यानुसार, बाजार समितीमधील कांदा बटाटा बाजार आवारात या मोर्च्याचा मुक्काम होणार आहे. (Latest Marathi News)

तसेच महिला आंदोलकांच्या राहण्याची व्यवस्था सिडको प्रदर्शन केंद्रात करण्यात आली आहे. नवी मुंबई केमिस्ट आणि ड्रग असोसिएशनच्या वतीने आरोग्यसुविधा सज्ज ठेवण्यात येणार आहे. प्रत्येक रुग्णालयात ५० टक्के खाटा राखीव ठेवल्या आहेत.

प्रत्येक दोन किमीवर वैद्यकीय पथक ठेवण्यात आले आहे. दरम्यान, २६ जानेवारी रोजी वाशीतील छत्रपती शिवाजी महाराज चौक येथे तिरंगा फडकवून लाखोंच्या संख्येने हा मोर्चा पुढे मुंबईत जाणार आहे. दुसरीकडे सरकारकडून जरांगे यांना मुंबईच्या वेशीवरच रोखण्याचा प्रयत्न सुरु असल्याची माहिती सूत्रांनी दिली आहे.

मनोज जरांगे यांच्यासह लाखो मराठा बांधव मुंबईत दाखल झाल्यास मोठी वाहतूक कोंडी निर्माण होऊ शकते. त्याचबरोबर कायदा आणि सुव्यवस्थेचा प्रयत्न देखील निर्माण होऊ शकते, असं अनेकांचं म्हणणं आहे. त्यामुळे सरकारच्या वतीने मनोज जरांगे यांची मनधरणी सुरू आहे.