मुंबई हादरली! नवऱ्याचा बायकोवर जीवघेणा हल्ला; हात अन् चेहर्‍यावर धारदार शस्त्राने वार

मयूर राणे, साम टीव्ही

मुंबई शहरातही विवाहित महिलांवर हल्ल्याच्या घटनांमध्ये वाढ होऊ लागली आहे. मुंबईत नवऱ्यानेच पत्नीवर धारदार शस्त्राने हल्ला केल्याची घटना उघडकीस आली आहे. भीषण हल्ल्यात महिला गंभीररित्या जखमी झाली आहे. या महिलेला तातडीने रुग्णालयात दाखल करण्यात आले आहेत. घटनेची माहिती मिळताच पोलिसांनी घटनास्थळी धाव घेतली आहे.

मुंबईच्या चेंबूरमधील घाटलामध्ये नवऱ्यानेच पत्नीवर जीवघेणा हल्ला केला. नवऱ्याने महिलेच्या चेहरा आणि हातावर धारदार शस्त्राने वार केलाय. गोवंडी पोलीस स्टेशनच्या हद्दीत संपूर्ण घटना घडली आहे. दोघांमध्ये कशावरून वाद झाला, याची माहिती अद्याप समोर आलेली नाही.

धारदार शस्त्राने वार केल्यानंतर आजूबाजूचे लोक मदतीला धावून आले. त्यानंतर या महिलेला तातडीने रुग्णालयात दाखल केले. या महिलेवर रुग्णालयात तातडीने उपचार सुरू करण्यात आले आहेत. पोलिसांनी घटनास्थळी पोहोचून पंचनामा केला आहे.

महिला सुरक्षेचा प्रश्न ऐरणीवर

मुंबईसहित देशातही महिलांवर हल्ल्याच्या घटनेत वाढ होऊ लागली आहे. नवऱ्याकडूनच बायकोवर जीवघेणा हल्ल्याच्या घटनेत वाढ होताना दिसत आहे. देशाची आर्थिक राजधानी मुंबईतही महिलांवर हल्ला होत असल्याचे समोर येत आहे. त्यामुळे महिलांच्या सुरक्षेचा प्रश्न उपस्थित होत आहे. महिलांवरील वाढते हल्ले रोखण्यासाठी पोलिसांनी पुढाकार घ्यावा, अशी मागणी केली जात आहे.