मुंबई गोवा महामार्गावर भीषण अपघात; उभ्या कंटेनरला मागून धडकली कार; एकाचा जागीच मृत्‍यू

मुंबई-गोवा राष्ट्रीय महामार्गावर कंटेनर आणि कारचा भीषण अपघात घडला आहे. उभ्या असलेल्या कंटेनरला भरधाव कार मागून धडकली.ही धडक इतकी भयानक होती, यात कारचा पूर्णपणे चक्काचूर झाला आहे. या दुर्घटनेत एकाचा जागीच मृत्यू झाला आहे. अशोक महादेव राऊत (वय ७९) असे मृताचे नाव आहे.

दहिसर, मुंबई येथील राऊत कुटुंबीय कोकणातून मुंबईला येत होते. महाड तालुक्यातील चांढवे बुद्रुक गावच्या हद्दीत राऊत कुटुंबीयांची कार आले असता अपघात घडला. येथील हॉटेल कृष्णा समोरील रस्त्यावर उभ्या असलेल्या कंटेनरला कारनं मागून धडक दिली. या कारमधून पाच जण प्रवास करत होते. राऊत कुटुंबीय कणकवली ते मुंबई प्रवास करीत होते. कारमधील पाच जणांपैकी एकाचा जागीच मृत्यू झाला तर इतर चार जखमी झालेत. जखमींवर महाडच्या ट्रॉम केअर युनिटमध्ये उपचार सुरू आहेत.

मिळालेल्या माहितीनुसार, कांदरपाडा, दहिसर येथील राऊत कुटुंबीय सकाळी कणकवली येथून मुंबईकडे MH 47 AG 4836 क्रमांकाच्या कारने निघाले होते. सायंकाळच्या सुमारास चांढवे बुद्रुक टोलनाक्याजवळ हॉटेल कृष्णा समोर रस्त्यावर उभ्या असलेल्या कंटेनरला कारने जोरदार धडक दिली. धडक इतकी भीषण होती की कारचा पुढील भाग पूर्णपणे चिरडला गेला. या अपघातात अशोक महादेव राऊत यांचा जागीच मृत्यू झाला.

तर गीतांजली सुमित राऊत (वय ३६), सुमित अशोक राऊत (वय ४१), सीमा अशोक राऊत (वय ७६), अमित अशोक राऊत (वय ४९) तसेच अंगत सुमित राऊत (वय ७) हे जखमी झालेत त्यांच्यावर उपचार सुरू आहेत. घटनेची माहिती मिळताच स्थानिक नागरिक, महाड एमआयडीसी पोलीस आणि महामार्ग पोलीस घटनास्थळी दाखल झाले. जखमींना तातडीने रुग्णालयात दाखल करण्यात आले. अपघातप्रकरणी पुढील तपास एमआयडीसी पोलीस ठाण्यामार्फत केला जात आहे.

डंपर चालकाची १२०० फूट खोल दरीत उडी मारून आत्महत्या

आंबोली घाटात आंबोली गावठणवाडी येथील एका डंपर चालकाने मुख्य दरडीच्या ठिकाणी बाराशे फूट खोल दरीत उडी मारून आपली जीवनयात्रा संपविली. राजाराम कुडतरकर असे या तरुणाचे नाव असून सोमवारी रात्रीपासून हा डंपर आंबोली घाटातील मुख्य दरडीच्या परिसरात उभा होता.

रात्रभर डंपर एकाच ठिकाणी उभा असल्याचे आणि चालक राजाराम याचा कोणताही पत्ता लागत नसल्याने डंपर मालकाला संशय आला. त्यांनी याची खबर आंबोली पोलीसांना दिल्यानंतर ड्रोन कॅमेऱ्याच्या मदतीने मृतदेहाचा शोध लावण्यात यश आले आहे. घटनेचा अधिक तपास आंबोली पोलीस करीत आहेत.