Mumbai Crime : मुंबईत हायप्रोफाइल सेक्स रॅकेटचा पर्दाफाश, पोलिसांनी धाड टाकत २ प्रसिद्ध अभिनेत्रीसह तिघांना घेतलं ताब्यात

मुंबईतून धक्कादायक बातमी समोर आली आहे. काही दिवसांपूर्वी पोलिसांनी नवी मुंबईतील तुर्भे येथून वेश्याव्यसाय प्रकरणी अनेकांना ताब्यात घेतलं होत. यानंतर मुंबईतील उच्चशिक्षित मानल्या जाणाऱ्या गिरगावातून वेश्याव्यवसायाशी संबंधित मोठे रॅकेट उघडकीस आले आहे. या कारवाईत दोन अभिनेत्रींची सुटका करण्यात आली असून सेलिब्रिटींसोबत काम करणाऱ्या एका मेकअप आर्टिस्टलाही पोलिसांनी ताब्यात घेतल्याची माहिती समोर आली आहे.

पोलिसांकडून मिळालेल्या माहितीनुसार, गिरगाव परिसरातील एका ठिकाणी महिलांना देहव्यापारासाठी भाग पाडले जात असल्याची गोपनीय माहिती मिळाली होती. या ठिकाणी मोठ्या प्रमाणात आर्थिक व्यवहार होत असल्याचाही संशय व्यक्त करण्यात आला होता. या माहितीची खात्री करण्यासाठी पोलिसांनी विशेष पथकाची नियुक्ती केली आणि एक बनावट ग्राहक घटनास्थळी पाठवला. प्राथमिक पडताळणीनंतर पोलिसांनी संबंधित ठिकाणी धाड टाकत कारवाई केली.

या धाडीत दोन महिलांची सुटका करण्यात आली. त्यापैकी एक महिला मराठी चित्रपटसृष्टीतील अभिनेत्री असल्याचे सांगितले जात आहे, तर दुसरी अभिनेत्री बंगाली आणि हिंदी चित्रपटांमध्ये लहान-मोठ्या भूमिका साकारत असल्याची माहिती समोर आली आहे. याच कारवाईदरम्यान मनोरंजन क्षेत्रातील काही सेलिब्रिटींसोबत काम करणारा एक मेकअप आर्टिस्टही पोलिसांच्या जाळ्यात अडकला. या रॅकेटमध्ये त्याची नेमकी काय भूमिका होती, याचा तपास सध्या सुरू आहे.

दरम्यान, या प्रकरणामागे आणखी काही व्यक्तींचा सहभाग असण्याची शक्यता पोलिसांनी व्यक्त केली आहे. संबंधित आरोपींकडून चौकशी सुरू असून या रॅकेटचे जाळे किती व्यापक आहे, याचा शोध घेतला जात आहे. तपासातून समोर येणाऱ्या निष्कर्षांच्या आधारे पुढील कायदेशीर कारवाई करण्यात येणार असल्याचे मुंबई पोलिसांनी स्पष्ट केले आहे.