Mumbai Dahi Handi 2025 : मुंबईत दहीहंडी उत्सवात ७५ गोविंदा जखमी, काहींची प्रकृती गंभीर, एकाचा मृत्यू

मुंबईमध्ये दहीहंडी उत्सवात अपघातांची मालिका सुरुच आहे. मुंबईत आतापर्यंत ७५ गोविंदा जखमी झाल्याची नोंद झाली आहे. तर मुंबईच्या मानखुर्दमध्ये एका गोविंदाचा मृत्यू झाला आहे. या घटनेने आनंदाच्या उत्साहात विरजण पडलं.

मुंबईत आज शनिवारी दिवसभर दहीहंडीचा उत्साह पाहायला मिळाला. मुंबईत ठिकठिकाणी दहीहंडीचं भव्य आयोजन पाहायला मिळालं. मुंबईतील विविध गोविंदा पथकांनी थरांचे मनोरे रचून दहीहंडी फोडल्या. यावेळी गोविंदा पथकातील गोविंदा डिजेच्या गाण्यावरही थिरकले. गोविंदा पथकांचा उत्साह वाढवण्यासाठी सेलिब्रिटींनी हजेरी लावली.

मुंबईतील ठिकठिकाणी दहीहंडीसाठी थर लावताना कोसळून अनेक गोविंदा जखमी झाले. आतापर्यंत ७५ गोविंदा जखमी झाले आहेत. मुंबईच्या कांदिवलीत येथील ९ वर्षीय गोविंदा आर्यन यादववर उपचार सुरू आहेत. तर २३ वर्षीय श्रेयस चाळके याला जी.टी. रुग्णालयात गंभीर दुखापतीमुळे दाखल करण्यात आले आहेत. त्याच्यावर उपचार सुरू आहेत.

मुंबईत दुपारपर्यंत ३० गोविंदा जखमी झाले होते. दहीहंडी उत्सवात दुपारी ४ पर्यंत एकूण ३० गोविंदा जखमी झाल्याची माहिती विविध सरकारी आणि बीएमसी रुग्णालयांकडून मिळाली आहे. त्यापैकी १५ जणांवर उपचार सुरू होते. उपचारानंतर १५ जणांना घरी सोडण्यात आले आहे. सायन रुग्णालयात १८, केईएममध्ये ६ तर नायरमध्ये ६ गोंविदा दाखल झाले होते, अशी माहिती अधिकाऱ्यांनी दिली होती.

मुंबईत एकाचा मृत्यू

मुंबईच्या मानखूर्दमध्ये एका गोविंदाचा मृत्यू झाल्याची घटना घडली. जगमोहन शिवकिरण चौधरी असे गोविंदाचे नाव आहे. दहीहंडीसाठी दोरी बांधताना तोल जाऊन कोसळला. त्यानंतर जगमोहनला तातडीने रुग्णालयात दाखल केले. मात्र, डॉक्टरांनी तरुणाला मृत घोषित केले.