दिवाळीनंतर निवडणुका लागणार? BMCच्या विभागरचनेबाबत सर्वात मोठी बातमी समोर

गणेश कवडे, साम टिव्ही

आगामी स्थानिक स्वराज्य संस्थांच्या निवडणुका काही महिन्यांवर येऊन ठेपल्या आहेत. सर्वोच्च न्यायालयानं जानेवारी अखेरपर्यंत निवडणुका घेण्याचे आदेश दिले आहेत. प्रत्येक पक्षानं मोर्चेबांधणीला सुरूवात केली आहे. नुकतीच पुण्यात प्रभागरचना जाहीर करण्यात आली. त्यानंतर आता मुंबईतील प्रभागरचनेबाबत मोठी माहिती समोर आली आहे. बृहन्मुंबई महानगरपालिकेच्या सार्वत्रिक निवडणूक-२०२५ करिता प्रभाग रचनेला राज्य निवडणूक आयोगाने मंजूरी दिलेली आहे. अंतिम प्रभाग रचना यादी अधिकृत संकेतस्थळावर प्रसिद्ध करण्यात आली आहे. येत्या निवडणुकीत हाच नकाशा लागू होणार आहे.

नुकतंच मुंबई महापालिका निवडणुकीसाठी अंतिम प्रभाग रचना जाहीर करण्यात आली आहे. मुंबईत २२७ प्रभागांची संख्या कायम ठेवण्यात आली आहे. २०१७ मधील प्रभागरचनेत फारसा बदल करण्यात आले नाही. अंतिम प्रभाग रचनेची यादी अधिकृत संकेतस्थळावर सादर करण्यात आली आहे.

दरम्यान, नुकतीच हरकती आणि सूचनांवर सुनावणी झाली असून, नागरिकांनी सुचवलेसे बदल अंतिम आराखाड्यात समाविष्ट केले आहेत का? हे लवकरच स्पष्ट होईल.

BMC निवडणुका कधी होणार?

पुढील काही दिवसांमध्ये राज्य निवडणुक आयोगाकडून अंतिम मतदार यादीही जाहीर केली जाईल. इतर स्थानिक स्वराज्य संस्थांच्या निवडणुका दिवाळीनंतर जाहीर होण्याची शक्यता आहे. मात्र, बीएमसीच्या निवडणुका डिसेंबरच्या शेवटी किंवा जानेवारीच्या पहिल्या आठवड्यात घेण्यात येतील, असा अंदाज वर्तवण्यात आला आहे.

राजकीय नेत्यांकडून मोर्चेबांधणीला सुरूवात

गेल्या काही वर्षांपासून स्थानिक स्वराज्य संस्थांच्या निवडणुका रखडल्या आहेत. २०१६ नंतर निवडणुका झाल्याच नाहीत. मात्र, आता लवकरच स्थानिक स्वराज्य संस्थांच्या निवडणुका पार पडतील. या निवडणुका दिवाळीपर्यंत घेण्यात येणार असल्याची माहिती समोर आली होती. मात्र, दिवाळीपर्यंत निवडणुका घेता आले नाही.

त्यानंतर राज्य सरकार आणि निवडणूक आयोगानं सर्वोच्च न्यायालयात धाव घेतली. तारीख वाढण्याची मागणी केली. सर्वोच्च न्यायालयानं राज्य सरकारला जानेवारी अखेरपर्यंत निवडणूक घेण्याचे आदेश दिले. सर्वोच्च न्यायलयानं दिलेल्या आदेशानुसार, महायुती, महाआघाडीसह इतर पक्षांनी मोर्चेबांधणीला सुरूवात केली आहे.