एका तासासाठी घरी येऊ का? मध्यरात्री भाजप नेत्याचा नग्न अवस्थेत व्हिडिओ कॉल, महिलेच्या आरोपाने राजकारणात खळबळ

संजय गडदे, साम टीव्ही

मुंबईतील भाजपच्या एका पदाधिकाऱ्यावर महिला कार्यकर्तीचा लैंगिक छळ केल्याप्रकरणी डोंगरी पोलीस ठाण्यात गुन्हा दाखल करण्यात आला आहे. आरोपी युसूफ रंगवाला हा भाजपचा कुलाबा विधानसभा मतदारसंघातील वॉर्ड क्रमांक 224 चा अध्यक्ष असल्याची माहिती समोर आली आहे. तक्रारदार महिलेच्या आरोपानुसार, युसूफ रंगवाला याने रात्री उशिरा, सुमारे 2 वाजण्याच्या सुमारास तिला फोन करून "मी एका तासासाठी तुमच्या घरी येऊ का?" अशी मागणी केली. महिलेने त्यास स्पष्ट नकार दिल्यानंतरही आरोपीने तिच्याशी संपर्क साधण्याचा प्रयत्न सुरू ठेवला.

तक्रारीनुसार, नकार मिळाल्यानंतर आरोपीने महिलेला व्हॉट्सॲप व्हिडिओ कॉल केला. त्या वेळी तो नग्न अवस्थेत होता आणि त्याने अश्लील हावभाव व चाळे केल्याचा गंभीर आरोप महिलेने केला आहे. या प्रकारामुळे आपण मानसिकदृष्ट्या त्रस्त झाल्याचेही महिलेने पोलिसांना सांगितले. महिलेच्या तक्रारीच्या आधारे डोंगरी पोलिसांनी युसूफ रंगवाला याच्याविरोधात भारतीय न्याय संहितेतील संबंधित कलमांनुसार गुन्हा नोंदवला असून प्रकरणाचा पुढील तपास सुरू आहे.

या घटनेमुळे राजकीय वर्तुळात खळबळ उडाली असून, पक्षाच्या पदाधिकाऱ्यावर झालेल्या गंभीर आरोपांमुळे भाजपची भूमिका काय असेल याकडेही लक्ष लागले आहे. पोलिसांकडून आरोपीची चौकशी करण्यात येत असून उपलब्ध डिजिटल पुराव्यांची पडताळणी सुरू असल्याची माहिती सूत्रांनी दिली.