Mira Bhayandar Protest : मीरा-भाईंदरमध्ये आंदोलन चिघळलं; मंत्री प्रताप सरनाईक यांच्यावर बाटली भिरकावली

मीरा-भाईंदरमध्ये मराठी मोर्चाची परवानगी मिळाल्यानंतर हजारो मराठी भाषिक मीरा रोड रेल्वे स्टेशनजवळ जमा झाले आहेत. मीरा-रोड स्टेशनजवळील मराठी भाषिकांचं आंदोलन चांगलंच चिघळलं आहे. मराठी भाषिकांच्या आक्रमक भूमिकेनंतर मंत्री प्रताप सरनाईक घटनास्थळी पोहोचले. मात्र, आक्रमक झालेल्या मराठी भाषिकांनी मंत्री प्रताप सरनाईक यांच्याविरोधात घोषणाबाजी केली. याचदरम्यान मंत्री प्रताप सरनाईक यांच्यावर बाटली भिरकावल्याचीही घटना घडली.

मीरा-भाईंदरमध्ये काही दिवसांपूर्वी एका अमराठी व्यापाऱ्याला मारहाण झाली होती. या माराहणीनंतर अमराठी व्यापाऱ्यांनी मोर्चा काढला होता. या मोर्चाच्या प्रत्युत्तरात मराठी भाषिकांनी आज मंगळवारी मोर्चाचं आयोजन केलं. मात्र, पोलिसांनी मोर्चाला परवानगी दिली नव्हती. पोलिसांनी रात्रीपासून काही कार्यकर्ते आणि नेत्यांना ताब्यात घेतले. मात्र, आज मंगळवारी उशिरा आंदोलन करण्याची परवानगी दिली. त्यानंतर मीरा रोड रेल्वे स्टेशनजवळ मोठ्या संख्येने मराठी भाषिक जमा झाले. या आंदोलनात मराठी भाषिकांनी जोरदार घोषणाबाजी केली.

मीरा रोड रेल्वे स्टेशनजवळ सुरु असलेल्या मोर्चाला मंत्री प्रताप सरनाईक यांनी हजेरी लावली. त्यावेळी संतप्त झालेल्या आंदोलकाने मंत्री प्रताप सरनाईक यांच्यावर बाटली भिरकावली. यावेळी आंदोलकांनी प्रताप सरनाईक यांच्या विरोधातही घोषणाबाजी केली. प्रताप सरनाईक गो बॅक, जय गुजरात अशा घोषणा आंदोलकांनी दिल्या.

मराठी भाषेच्या अस्मितेसाठी मीरा रोडमध्ये पुकारण्यात आलेलं आंदोलन चिघळलं आहे. या मोर्चामुळे परिसरात तणावाचे वातावरण निर्माण झालं आहे. शहरात पोलीस विरुद्ध आंदोलनकर्ते असं वातावरण काहीसं दिसू लागलं आहे. पोलीस मराठी माणसाला दाबण्याचा प्रयत्न करत असल्याचा आरोप आंदोलकांनी केला आहे.

दरम्यान, मराठी भाषिकांच्या मोर्चासाठी मनसे नेते नितीन सरदेसाई, संदिप देशपांडे यांनी लोकलचा प्रवास करून मीरा रोड येथील आंदोलनात सहभागी झाले. ठाकरे गटाचे माजी खासदार राजन विचारे देखील आंदोलनात सहभागी झाले. या आंदोलनात मनसे, शिवसेना आणि मराठी एकीकरण समितीचे शेकडो कार्यकर्ते सहभागी झाले आहेत.