Mira-Bhayandar: कारमध्ये डांबून अल्पवयीन मुलीवर अत्याचार; महिला बालकल्याण समिती सभापतीच्या सख्खा भावाला अटक

छत्रपती शिवाजी महाराज चॅरिटेबल ट्रस्ट व पेणकर पाडा ग्रामस्थांच्या वतीने हा मोर्चा काढण्यात आला होता. या मोर्चात मोठ्या संख्येने नागरिक सहभागी झाले होते. आंदोलकांनी दिलेल्या माहितीनुसार, अनिता पाटील यांचे सख्खे भाऊ राजेश चव्हाण याच्यावर अल्पवयीन मुलीवर अनेक वर्षे लैंगिक अत्याचार केल्याचा आरोप आहे. आता त्याप्रकणी त्याला पॉक्सो कायद्याअंतर्गत अटक करण्यात आली आहे.

५० वर्षीय आरोपीने अल्पवयीन मुलीला कारमध्ये डांबून आणि गोराईतील हॉटेलमध्ये नेऊन लैंगिक अत्याचार केला होता. यासह आरोपी राजेश चव्हाणने पीडितेसह तिच्या आईलाही जीवेठार मारण्याची धमकी दिली होती. आरोपीवर यापूर्वी देखील वीज चोरी आणि पत्रकारावर हल्ला केल्याचेही गुन्हे दाखल आहेत.

दरम्यान अनिता पाटील यांनी हे गंभीर प्रकरण दाबण्याचा प्रयत्न केला. त्यांनी पदाचा प्रभाव वापरून पीडित मुलीच्या कुटुंबीयांवर आणि तपास अधिकाऱ्यांवर दबाव आणण्याचे प्रयत्न झाल्याचाही आरोप आंदोलकांनी केला आहे. यामुळे महिला व बालकल्याण समितीच्या सभापतीपदावर राहण्याचा नैतिक अधिकार अनिता पाटील यांनी गमावला असून महापौरांनी त्यांचा तत्काळ राजीनामा घ्यावा, अशी मागणी आंदोलकांनी केली. यावेळी पालिका परिसरात घोषणाबाजी करण्यात आली तसेच निवेदनही सादर करण्यात आले.