राज ठाकरेंना आणखी एक मोठा धक्का; ऐन निवडणुकीत बड्या नेत्यांनी धरली शिंदेसेनेची वाट

मुंबई महापालिका निवडणुकीसाठी ठाकरे बंधूंनी कंबर कसली आहे. या निवडणुकीत दोन्ही ठाकरेंनी मुंबई पिंजून काढायला सुरुवात केली आहे. उद्धव ठाकरे यांच्यानंतर राज ठाकरे देखील आज मनसे उमेदवारांच्या शाखा भेटीच्या दौऱ्यावर आहेत. शाखा भेटीच्या दौऱ्यावर असलेल्या राज ठाकरेंना दुसरा मोठा धक्का बसला आहे. संतोष धुरी यांच्यानंतर अनेक बड्या नेत्यांनी शिंदेंच्या शिवसेनेत प्रवेश केला आहे.

मनसे नेते संतोष धुरी यांनी आज मंगळवारी भाजपमध्ये प्रवेश केला. तिकीट वाटपावरून नाराज झालेल्या संतोष धुरी यांनी काल मुख्यमंत्री देवेंद्र फडणवीस यांची भेट घेतली. त्यानंतर संतोष धुरी यांनी आज भाजपचे मुंबई अध्यक्ष अमित साटम यांच्या उपस्थितीत भाजपमध्ये प्रवेश केला. तर संतोष धुरी यांच्यानंतर मनसे प्रवक्ते हेमंत कांबळे यांनी शिंदे गटात प्रवेश केला.

उपमुख्यमंत्री एकनाथ शिंदे यांच्या उपस्थितीत हेमंत कांबळे यांच्यासहित इतर नेत्यांनी शिवसेनेत प्रवेश केला आहे. एकनाथ शिंदे यांच्या उपस्थितीत महाराष्ट्र नवनिर्माण सेनेचे सरचिटणीस राजा चौगुले, मनसेचे प्रवक्ते हेमंत कांबळे, मनसे चित्रपट सेनेचे सरचिटणीस राहुल तूपलोंढे, महाराष्ट्र नवनिर्माण विद्यार्थी सेनेचे संदेश शेट्टी, मुनव्वर शेख, जनहित कक्षाचे अॅड.देवाशीष मर्क, प्रथमेश बांदेकर, संतोष यादव यांनी शिवसेना पक्षात जाहीर प्रवेश केला.

मनसे नेत्यांच्या शिवसेना पक्षप्रवेशावेळी शिवसेना सरचिटणीस राहुल शेवाळे, शिवसेना सचिव सुशांत शेलार, शिवसेना प्रवक्त्या शीतल म्हात्रे तसेच शिवसेना पदाधिकारी आणि शिवसैनिक उपस्थित होते.