Ajit Pawar News : अजित पवारांची आगामी निवडणुकीसाठी गेमचेंजर खेळी; शरद पवार अन् भाजपचे २ बडे नेते फोडले

सचिन जाधव, साम टीव्ही

पुणे जिल्ह्यातील हे दोन जुने सहकारी परत उपमुख्यमंत्री अजित पवार यांच्यासोबत काम करणार आहे. उपमुख्यमंत्री अजित पवार यांच्या उपस्थितीत उद्या पक्ष प्रवेश करणार आहे. स्थानिक स्वराज्य संस्था निवडणुकीच्या पार्श्वभूमीवर उपमुख्यमंत्री अजित पवार यांनी भाजप आणि राष्ट्रवादी काँग्रेस पार्टी (शरद पवार) पक्षाला धक्का दिला आहे.

पुणे जिल्हा परिषदेचे माझे अध्यक्ष जालिंदर कामटे आणि जिल्हा भूविकास बँकेचे माजी संचालक मुरलीधर निंबाळकर अजित पवारांच्या उपस्थितीत उद्या राष्ट्रवादी काँग्रेस पार्टीमध्ये प्रवेश आहेत.

उपमुख्यमंत्री अजित पवार यांच्या प्रमुख उपस्थितीत हे दोन्ही नेते उद्या सकाळी साडेनऊ वाजता पक्षाच्या जिल्हा कार्यालयात राष्ट्रवादी काँग्रेसमध्ये प्रवेश करणार आहेत. सध्या कामठे हे भाजपचे तर,निंबाळकर हे राष्ट्रवादी काँग्रेस शरदचंद्र पवार पक्ष या पक्षांमध्ये कार्यरत आहेत. कामठे हे भाजपच्या पश्चिम महाराष्ट्र विभागाचे अध्यक्ष आहेत. दोन्ही नेते पुर्वाश्रमीचे राष्ट्रवादी काँग्रेसचेच आहेत. तर कालांतराने ते अन्य पक्षांत गेले होते. दरम्यान, या दोन्ही नेत्यांच्या घरवापसीमुळे पुरंदर आणि इंदापूर तालुक्यात पर्यायाने पुणे जिल्ह्यात राष्ट्रवादी काँग्रेसची ताकद वाढणार आहे.

गेल्या काही महिन्यांत भाजपने बारामती लोकसभा मतदारसंघातील अनेक दिग्गज नेत्यांना पक्षात घेऊन आपली ताकद वाढवली आहे. यामध्ये भोर वेल्हा मुळशीचे माजी आमदार संग्राम थोपटे,पुरंदरचे माजी आमदार संजय जगताप, इंदापूरचे विधानसभा अपक्ष निवडणूक लढवणारे प्रवीण माने यांना पक्षात प्रवेश घेऊन येणाऱ्या स्थानिक स्वराज्य संस्था निवडणुकीत पक्ष मजबूत केला आहे.

उपमुख्यमंत्री अजित पवार यांच्याकडे गेले अनेक वर्ष असलेल्या जिल्हा परिषद कोणाकडे जाणार याकडे राज्याचे लक्ष असेल. त्यामुळे आता उपमुख्यमंत्री अजित पवार यांनीही पुणे शहर,पिंपरी चिंचवड आणि पुणे ग्रामीण भागाकडे स्थानिक स्वराज्य संस्था निवडणूक पार्श्वभूमीवर नेत्यांना आपल्या पक्षात घेण्यास सुरुवात केली. त्यामुळे अजित पवार याच्याकडे भविष्यात अजून कोण नेते येतात हे पाहावे लागेल.