Nandurbar Adivasi Morcha : नंदूरबार का पेटलं? आदिवासी मोर्चाला हिंसक वळण; १४० हून अधिक जण पोलिसांच्या ताब्यात

सागर निकवाडे, साम टीव्ही

नंदूरबारमधील आदिवासी समाजाच्या मोर्चाला काल हिंसक वळण लागलं. या आंदोलनात दगडफेक आणि वाहनांची तोडफोड झाल्याची देखील घटना घडली. आंदोलनाला हिंसक वळण लागल्याने परिसरात एकच खळबळ उडाली होती. या आंदोलनादरम्यान झालेल्या दगडफेकीत नागरिकांसह पोलीस देखील जखमी झाले होते. या प्रकरणी पोलिसांनी कारवाईचा मोठा बडगा उगारला आहे. नंदूरबार पोलिसांनी आतापर्यंत १४० हून अधिक आंदोलक ताब्यात घेतले आहेत.

नंदुरबार पोलिसांनी मुकमोर्चादरम्यान जिल्हाधिकारी कार्यालयासह परिसरातील शासकीय कार्यालयात झालेल्या तोडफोड प्रकरणी १४० हून अधिक जणांना ताब्यात घेतलं. यातील १३ जणांची ओळख परेड झाल्यानंतर त्यांचा सहभाग दिसून आला नाही. त्यामुळे त्यांना सोडून देण्यात आले आहे. तर या दगडफेक आणि हल्लात 25 हून अधिक पोलीस अधिकारी कर्मचारी आणि ०७ नागरिक जखमी झाले आहेत.

मोर्च्यामधील समाजकटंकांनी ही तोडफोड केली. या प्रकरणात ड्रोन आणि सीसीटीव्ही कॅमेराद्वारे तपासणी करुन त्यांना अटक करण्याची प्रक्रिया सुरु करण्यात आली आहे. या घटनेबाबात सोशल मीडियाद्वारे लोकांना भडकणाऱ्यांवर देखील गुन्हे दाखल केले जात आहेत. या प्रकरणी नागरिकांनी शांतता राखण्याचे आवाहन पोलीस प्रशासनाकडून केले जात आहेत.

आदिवासी तरुणाच्या हत्या प्रकरणावरून नंदूरबारमध्ये हा मूक मोर्चा काढण्यात आला होता. या हत्या प्रकरणातील आरोपी आणि पीडित या दोघांची गुन्हेगारी पार्श्वभूमी असून एका अफेयरच्या वादातूनच दोघांमध्ये ही घटना घडल्याचा दावा पोलिसांकडून केला जात आहे. दरम्यान, नाशिक परिक्षेत्राचे विशेष पोलीस निरीक्षक नंदुरबारमध्ये ठाण मांडून बसले असून प्रत्येक घटनेचा आढाव घेत आहेत.