Matheran Accident : माथेरान घाटात भीषण अपघात; मुंबईतील पर्यटकांची कार दरीच्या बाजूला कोसळली

विकास मिरगणे, साम टीव्ही

माथेरान घाटात आज, सोमवारी दुपारी भीषण अपघात झाला. मुंबईतील कुर्ल्याहून आलेल्या पर्यटकांची कार दरीच्या बाजूला कोसळून ती खाली रस्त्यावर आदळली. यात चार जण जखमी झाले असून, एक महिला सुखरूप असल्याची माहिती आहे. अलीकडच्या काळात घाटात अपघात होण्याच्या घटनांमध्ये वाढ होत असून, वाहतूक सुरक्षिततेचा प्रश्न ऐरणीवर आला आहे.

मुंबईतील कुर्ला-चेंबूर परिसरातील पाच पर्यटकांचा एक गट माथेरानला निघाला होता. कारमधून जात असताना वळणावर चढणीला चालकाचा स्टिअरिंगवरील ताबा सुटला. कार दरीच्या बाजूला कोसळली आणि घाटात खालील बाजूस असलेल्या रस्त्यावर आदळली. या अपघातात पर्यटक जखमी झाले आहेत.

वळणावर समोरून वाहन आलं अन्...

कुर्ला येथील पर्यटक वाहनानं नेरळ येथून माथेरानला जात होते. कारने घाटातून जात असताना अवघड वळण असलेल्या पिटकर पॉइंट येथील येस टन येथे अचानक समोरून वाहन आलं. ते बघून चालकाचं कारवरील नियंत्रण सुटलं. रस्त्यालगत रेलिंग नसल्यानं कार थेट दरीच्या बाजूला कोसळली. तेथून ती घाटाच्या खालील बाजूस असलेल्या रस्त्यावर आदळली.

माथेरान घाटात हा अपघात दुपारी दोनच्या सुमारास घडला. दरीच्या बाजूने कार थेट रस्त्यावर आपटल्यानं दर्शनी भागाचं नुकसान झालंय. सुदैवानं या कारमधील सर्व पर्यटक बचावले आहेत. या अपघातात श्रीधर साळुंखे, सोहेल शेख, अहमद खान आणि आकाश गायकवाड जखमी झाले आहेत. एका पर्यटकाच्या डोळ्याला दुखापत झाली आहे. त्याला पुढील उपचारासाठी नेण्यात आले आहे. शिवाय अन्य एका पर्यटकाच्या डोक्याला, तर इतर दोघे किरकोळ जखमी झाले आहेत.

स्थानिक वाहनचालकांची तत्परता

अपघातग्रस्तांच्या मदतीला स्थानिक वाहनचालक धावून गेले. तत्परता दाखवून त्यांनी अपघातग्रस्त कारमधून सर्व जखमींना बाहेर काढले. नेरळ येथील शेवाळे रुग्णालयात तात्काळ दाखल केले. या वळणावर यापूर्वीही अनेक अपघाताच्या घटना घडल्या आहेत. सुरक्षेसाठी लावण्यात आलेले रेलिंग तुटलेले आहेत. या ठिकाणी सार्वजनिक बांधकाम विभागानं रेलिंग बसवलेल्या नाहीत. येथील वाहनचालक आणि येणाऱ्या पर्यटकांच्या सुरक्षिततेचा प्रश्न निर्माण झाला आहे.