Rain Alert : महाराष्ट्रात मुसळधार पाऊस, पुण्यासह ७ जिल्ह्यांना सतर्कतेचा इशारा; वाचा हवामानाचा अंदाज

राज्यातील बहुतांश भागात आज पावसाचा जोर काहीसा कमी होण्याची शक्यता असून, काही निवडक भागांमध्ये मात्र जोरदार सरी आणि विजांच्या कडकडाटासह पावसाचा इशारा देण्यात आला आहे. भारतीय हवामान विभागाने कोकण, घाटमाथा आणि विदर्भातील काही जिल्ह्यांसाठी येलो अलर्ट जारी करत नागरिकांनी आवश्यक ती खबरदारी घ्यावी, असे आवाहन केले आहे.

हवामान विभागाच्या अंदाजानुसार रायगड, रत्नागिरी, पुणे घाटमाथा, सातारा घाटमाथा आणि कोल्हापूरच्या घाटमाथ्यावर दिवसभरात जोरदार पावसाच्या सरी कोसळण्याची शक्यता आहे. या भागांमध्ये काही ठिकाणी अल्पावधीत मुसळधार पाऊस होऊ शकतो.

दुसरीकडे विदर्भातील अकोला, वाशीम, अमरावती, गोंदिया, गडचिरोली आणि चंद्रपूर जिल्ह्यांमध्ये विजांच्या कडकडाटासह पावसाची शक्यता व्यक्त करण्यात आली आहे. उर्वरित महाराष्ट्रात मात्र ऊन आणि ढगाळ वातावरणाचा खेळ सुरू राहण्याची शक्यता असून, काही भागांत हलक्या ते मध्यम स्वरूपाच्या पावसाच्या सरी पडू शकतात.

गेल्या काही दिवसांच्या तुलनेत पावसाचा जोर कमी राहण्याचा अंदाज आहे. दरम्यान, शेतकऱ्यांनी हवामानाचा अंदाज लक्षात घेऊन शेतीची कामे करावीत असे आवाहन प्रशासनाकडून करण्यात आले आहे.

पुण्यात पाणीसाठा वाढला

पुणे शहराला पाणीपुरवठा करणाऱ्या चार प्रमुख धरणांमध्ये सध्या एकूण ९९.०९ टक्के पाणीसाठा झाला असून, तो गेल्या वर्षीच्या तुलनेत सुमारे १२ टक्क्यांनी अधिक आहे. यंदा मॉन्सून उशिरा दाखल झाला असला तरी जुलैच्या शेवटच्या आठवड्यात झालेल्या दमदार पावसामुळे धरणांतील पाणीसाठ्यात मोठी वाढ झाली. सध्या खडकवासला, पानशेत आणि वरसगाव ही तीनही धरणे १०० टक्के भरली असून टेमघर धरणात ९२.८४ टक्के पाणीसाठा आहे. गेल्या वर्षी याच दिवशी चारही धरणांमध्ये ८७.९७ टक्के पाणीसाठा नोंदवला गेला होता.