Maharashtra Politics: महायुती सरकारचं मंत्रिमंडळ विस्तार कधी? गृहमंत्रिपदावर शिवसेनेचा दावा कायम

सूरज मसूरकर, मुंबई

विधानसभा निवडणुकीमध्ये राज्यामध्ये महायुती विजयी झाली. राज्यात पुन्हा महायुतीचे सरकार आले. महायुती सरकारच्या मुख्यमंत्री आणि दोन मुख्यमंत्र्यांचा शपथविधी सोहळा पार पडला. त्यानंतर २८८ आमदारांनी देखील शपथ घेतली. पण अद्याप महायुती सरकारचा मंत्रिमंडळ विस्तार झाला नाही. महायुतीमध्ये मंत्रिमंडळ विस्तारावराचा तिढा अद्याप सुटलेला नसून शिवसेना आणि भाजपमध्ये मंत्रिपदाच्या वाटपावरून नाराजी पाहायला मिळत आहे. मंत्रिमंडळाच्या विस्ताराकडे सर्वांचे लक्ष लागले आहे.

शिवसेनेत अद्यापही अस्वस्थता कायम आहे. मंत्रिमंडळ विस्तारावरुन अनेकजण गॅसवर आहेत. मोठी खाती पदारात पाडून घेण्यासाठी शिवसेना आग्रही आहे. मुख्य म्हणजे गृहमंत्रिपदावर शिवसेनेचा आजही दावा कायम आहे. गृहमंत्रिपदासाठी शिवसेनेची कठोर भूमिका? तर दुसरीकडे भाजपही गृहमंत्रिपद सोडण्यास तयार नाही आहे.

विशेष अधिवेशन संपताच तीनही नेत्यांची मंत्रिमंडळ विस्तारावरुन बैठकीची शक्यता होती. मात्र विशेष अधिवेशन संपूनही मंत्रिमंडळ विस्तारावरुन बैठक झालेली नाही. काही दिवसातचं नागपूरचे हिवाळी अधिवेशन सुरू होईल. या अधिवेशनाआधी मंत्रिमंडळ विस्तार होणार का? याकडे सर्वांच्या नजरा लागल्या आहेत. मंळवारी एकनाथ शिंदे ठाण्यात तर देवेंद्र फडणवीस हे मुंबईतच असल्याने कोणतीही भेट किंवा चर्चा न झाल्याने चर्चंना उधाण आले आहे.

दरम्यान, भाजपचे प्रदेशाध्यक्ष चंद्रशेखर बावनकुळे यांनी मंगळवारी रात्री ठाण्यात उपमुख्यमंत्री एकनाथ शिंदेची भेट घेतली. मंत्रिमंडळ विस्तारासंदर्भात दोघांत चर्चा झाल्याची माहिती समोर आली आहे. रात्री उशिरा भेट घेत जवळपास दीड तास दोघांमध्ये चर्चा झाली. गृहमंत्रिपदावरून भाजप आणि शिवसेनेमध्ये अजूनही रस्सीखेच सुरू आहे. दोन्ही पक्ष गृहमंत्रिपदावर ठाम आहेत.