Maharashtra Politics: उद्धव ठाकरेंनंतर एमआयएमला मोठा धक्का; BMCमधील नगरसेवकाचं पद रद्द, कारण काय?

राज्यातील राजकारणात मोठी घडामोडी होत आहेत. ठाकरे गटातील सहा खासदारांनी शिंदे गटात प्रवेश केल्याने उद्धव ठाकरेंना मोठा धक्का बसला आहे. आता एमआयएमला मोठा धक्का बसला आहे. एमआयएमचे नगरसेवक शमीर पटेल यांचे नगरसेवकपद रद्द करण्यात आले आहे. मुंबई महापालिकेतील ऑल इंडिया मजलिस -ई -इत्तेहादुल मुस्लिमीन (AIMIM) पक्षाला मोठा धक्का बसलाय. गोवंडी येथील प्रभाग क्रमांक 137 मधून निवडून आलेले एमआयएमचे नगरसेवक शमीर पटेल यांचे नगरसेवकपद रद्द करण्यात आलंय.

नगरसेवक पद का रद्द झालं? काय आहे कारण ?

शमीर पटेल यांनी ओबीसी प्रवर्गासाठी राखीव असलेल्या जागेवरून निवडणूक लढवली होती, तेथे त्यांना मोठा विजय मिळला होता. मात्र, त्यांच्या जात वैधता प्रमाणपत्राबाबत आक्षेप घेण्यात आल्यानंतर प्रकरण जात पडताळणी समितीकडे गेलं होतं. त्यानंतर अहमदनगर डिस्ट्रिक्ट कास्ट स्क्रूटिनी कमिटी(सध्याचे अहिल्यानगर) जिल्हा जात पडताळणी समितीने शमीर पटेल यांचे जात वैधता प्रमाणपत्र अवैध ठरवले.

समितीच्या या निर्णयानंतर त्यांचे नगरसेवकपद रद्द करण्याची प्रक्रिया सुरू करण्यात आली होती. त्यानुसार महापालिकेने घोषणा करत त्यांचे सदस्यत्व रद्द केलं. महापालिकेच्या निर्णयामुळे मुंबई महापालिकेतील एमआयएमचे संख्याबळ आठवरून सातवर आले आहे. आगामी राजकीय समीकरणांच्या दृष्टीने हा पक्षासाठी महत्त्वाचा धक्का मानला जातोय.

दरम्यान शमीर पटेल यांचे सदस्यत्व रद्द झाल्यानंतर महापालिकेतील राजकीय वातावरण तापले असून विविध पक्षांकडून यावर प्रतिक्रिया उमटू लागल्या आहेत. दरम्यान याआधी महापालिकेत नगरसेवकाचे पद रद्द करण्यात आले आहे. शिवसेना (उद्धव बाळासाहेब ठाकरे) पक्षाच्या एका नगरसेवकाचेही सदस्यत्व इतर कारणांमुळे रद्द करण्यात आले होते.