Pune : पुण्यातील वेल्हे तालुक्याचे नामकरण आता ‘राजगड’, फडणवीस सरकारचा मोठा निर्णय

Velhe taluka renamed as Rajgad in Pune district : पुणे जिल्ह्यातील वेल्हे तालुक्याचे नवे राज्य सरकारने बदलले आहे. आता वेल्हे तालुक्याचे नाव राजगड असे असणार आहे. महसूल मंत्री चंद्रशेखर बावनकुळे यांनी हा ऐतिहासिक निर्णय घेतला आहे. राजगड नावाला केंद्र सरकारची मान्यता मिळाली आहे. लवकरच याबाबत महाराष्ट्र सरकारचे राजपत्र जारी होणार आहे. छत्रपती शिवाजी महाराजांची प्रथम राजधानी असलेल्या राजगड किल्ल्याच्या पायथ्याशी वेल्हे तालुका आहे, त्यामुळे तालुक्याचे नाव बदलून राजगड असे करण्यात आल्याचे म्हटले जातेय.

वेल्हे तालुक्याचे नाव राजगड करण्याबाबत मुख्यमंत्री देवेंद्र फडणवीस यांच्याकडून सूचना देण्यात आल्या होत्या. त्यानंतर महसूल मंत्री चंद्रशेखर बावनकुळे यांनी नाव बदलण्याचा निर्णय घेतला. वेल्हे तालुक्यातील 70 पैकी 58 ग्रामपंचायती तसेच पुणे जिल्हा परिषदेने नाव बदलाच्या मंजूर केलेल्या ठरावाला महसूल विभागाकडून मान्यता देण्यात आला आहे.

लवकरच महाराष्ट्र सरकारकडून याबाबत राजपत्र जारी करण्यात येणार आहे. या निर्णयामुळे छत्रपती शिवाजी महाराजांच्या ऐतिहासिक वारशाला सन्मान देण्याचा प्रयत्न असल्याचे प्रतिक्रिया सत्ताधाऱ्यांच्या गोटातून येत आहे. हा बदल स्थानिक नागरिकांमध्ये अभिमानाची भावना निर्माण करेल, असेही म्हटले जातेय.