Accident Tragedy : ताम्हिणी घाटात थरार! अंधारात टॉयलेटला गेले, दरीचा अंदाज न आल्याने खोल दरीत कोसळले

अमित गवळे,रायगड

कोकणातून पुण्याकडे प्रवास करत असताना ताम्हिणी घाटात टॉयलेटला गेलेल्या एका व्यक्तीचा अंधारामुळे अंदाज न आल्याने थेट खोल दरीत कोसळल्याची थरारक घटना घडली. सुदैवाने पोलिस आणि सह्याद्री वन्यजीव रक्षणार्थ सामाजिक संस्थेच्या बचाव पथकाने तातडीने धाव घेत अवघ्या ४५ मिनिटांत त्यांना सुखरूप बाहेर काढले. या घटनेने काही काळ घटनास्थळी तणावाचे वातावरण निर्माण झाले होते.संदेश विश्राम हाडवळे (वय ४७) असे जखमी प्रवाशाचे नाव असून ते चिपळूणहून आपल्या मुलासोबत कारने पुण्याकडे निघाले होते.

मिळालेल्या माहितीनुसार, शुक्रवारी पहाटे दोन वाजण्याच्या सुमारास ताम्हिणी घाटातील वॉटरफॉल पॉईंटजवळ आल्यानंतर त्यांना टॉयलेटला झाल्याने त्यांनी वाहन रस्त्याच्या कडेला थांबवले. मध्यरात्रीची वेळ असल्याने प्रचंड अंधार होता. त्यात आजूबाजूला असलेल्या दरीची खोली देखील खूप होती. या दरीच्या खोलीचा आणि त्यांच्यामधील सुरक्षित अंतर यांचा अंदाज त्यांना आला नाही. याचवेळी त्यांचा तोल जाऊन ते थेट दरीत कोसळले.

वडील अचानक नजरेआड झाल्याने आणि दरीतून आवाज आल्याने त्यांच्यासोबत असलेल्या मुलाची घाबरगुंडी उडाली. त्याने तत्काळ पोलिसांना घटनेची माहिती दिली. माहिती मिळताच पोलीस कर्मचारी तसेच सह्याद्री वन्यजीव रक्षणार्थ सामाजिक संस्थेचे आपत्कालीन बचाव पथक आवश्यक साहित्य घेऊन घटनास्थळी दाखल झाले.

पहाटेची वेळ, घाटातील दाट अंधार आणि खोल दरी यामुळे बचावकार्य अत्यंत कठीण झाले होते. मात्र, रेस्क्यू टीमच्या सदस्यांनी धाडसाने दरीत उतरून शोधमोहीम सुरू केली. सुमारे ४५ मिनिटांच्या अथक प्रयत्नांनंतर जखमी अवस्थेत पडलेल्या संदेश हाडवळे यांचा शोध घेण्यात यश आले. त्यांना सुरक्षितरित्या वर आणून तातडीने उपचारासाठी जवळच्या रुग्णालयात दाखल करण्यात आले. या अपघातात त्यांच्या पायाला गंभीर दुखापत झाली असून हाड मोडल्याचे डॉक्टरांनी सांगितले आहे. तसेच शरीराच्या इतर भागांवरही जखमा झाल्या आहेत. दरम्यान, रेस्क्यू टीम आणि पोलिसांच्या तत्परतेमुळे संभाव्य मोठी दुर्घटना टळल्याने परिसरातून त्यांच्या कार्याचे कौतुक होत आहे.