Kangana Ranaut and Javed Akhtar : कंगना- जावेद अख्तर यांच्या वादाला पूर्णविराम; दुर्मिळ फोटो शेअर करून दिली माहिती

मुंबई: अभिनेत्री कंगना रणौत आणि ज्येष्ठ संगीतकार जावेद अख्तर यांच्यातील न्यायालयीन संघर्षाला अखेर पूर्णविराम मिळाला आहे. दोघांमधील वाद मिटल्याचा पुरावाच स्वतः कंगना यांनी दिला आहे. सोशल मीडियावर त्यांनी हा फोटो शेअर करून ही माहिती दिली आहे.

अभिनेत्री आणि खासदार कंगना रणौत नेहमीच काहीना काही कारणाने चर्चेत असतात. अनेकदा तर रोखठोक वक्तव्यांमुळं शाब्दिक वादही झाले आहेत. सोशल मीडियावर देखील बऱ्याचदा ट्रोल होतात. मागच्या 5 वर्षांपासून कंगना रणौत आणि ज्येष्ठ संगीतकार जावेद अख्तर यांच्यामध्ये न्यायालयीन लढाई सुरू होती. आता ही लढाई संपली आहे. न्यायालयीन संघर्ष संपल्याचे जाहीर करतानाच कंगना यांनी इन्स्टाग्राम अकाऊंटवर एक स्टोरी पोस्ट केली. ती स्टोरी बघताच सर्वच थक्क झाले. कंगना यांनी जावेद यांच्यासोबत एक खास फोटो पोस्ट करून दोघांमधला जो वाद होता तो आता निवळला आहे, असे अधोरेखित केले आहे.

कंगनांच्या पोस्टमध्ये काय?

कंगना यांनी इन्स्टाग्रामवर फोटो पोस्ट करून एक कॅप्शन लिहिली आहे. जावेद यांच्याविरुद्धचे न्यायालयात जे प्रकरण प्रविष्ठ होते ते आता आम्ही थांबवले आहे. आता आमच्यात कुठलीही न्यायालयीन लढाई राहिली नाही. गीतकार जावेद साहेब खूप दयाळू आणि उदार मनाचे आहेत. तसेच मी जो आगामी सिनेमा दिग्दर्शित करणार आहे, त्यासाठी ते गाणं लिहिणार आहेत आणि त्यासाठी त्यांनी होकारही दिला आहे.

कंगना आणि जावेद अख्तर यांच्यातला वाद नेमका काय?

कंगना आणि ऋतिक रोशन यांच्यातील वाद चांगलाच गाजला होता. त्यावेळेस जावेद अख्तर यांनी एक मीटिंग बोलावून कंगना यांना ऋतिकची माफी मागायला सांगितली होती. तसेच जावेद यांनी मला माफी मागण्यासाठी दबाव टाकला होता, असा आरोप कंगना यांनी केला होता. त्यानंतर जावेद यांनी कंगना यांच्याविरोधात मानहानीचा दावा दाखल केला होता. पण कंगना या एकाही सुनावणीसाठी न्यायालयात हजर झाल्या नव्हत्या. न्यायालयाने कंगना यांना शेवटची संधी दिली होती. तरी देखील त्या उपस्थित राहिल्या नाहीत. त्यांच्याविरोधात आजामीनपत्र वॉरंटही जारी करण्यात आले होते. परंतु आता या दोघांमधील न्यायालयीन संघर्ष कायमचा मिटला आहे.