Kalyan : गस्तीवेळी संशयास्पद हालचाल दिसली; थांबवण्याचा प्रयत्न करताच दोघांनी पळ काढला नंतर... कल्याण पोलिसांची मोठी कारवाई

संघर्ष गांगुर्डे, कल्याण

कल्याणमधून मोठी बातमी समोर आली आहे. अंमली पदार्थांविरोधात पोलिसांनी कारवाई करत तब्बल कोट्यवधींचे ड्रग्स जप्त केले आहे. कल्याण पोलीस उप आयुक्त, परिमंडळ ०३ यांच्या अंमली पदार्थ विरोधी पथकाने ही कारवाई केली असून, या प्रकरणात पाच आरोपींना अटक करण्यात आली आहे. या कारवाईमुळे मोठ्या ड्रग्स रॅकेटचा पर्दाफाश झाला आहे.

मिळालेल्या माहितीनुसार, १ एप्रिल रोजी अंमली पदार्थ विरोधी पथकातील अधिकारी आणि कर्मचारी महात्मा फुले चौक पोलीस ठाणे हद्दीत गस्त घालत होते. यावेळी कल्याण पश्चिमेतील सांगळेवाडी स्मशानभूमीजवळ दोन संशयित व्यक्ती दिसून आल्या. त्यांच्या हालचाली संशयास्पद वाटल्याने पोलिसांनी त्यांना थांबवण्याचा प्रयत्न केला. मात्र, दोघांनीही पळून जाण्याचा प्रयत्न केला. पोलिसांनी तत्परतेने कारवाई करत त्यांना ताब्यात घेतले. तपासादरम्यान कासिम अब्दुल सत्तार वसईकर आणि कृष्णा नागप्पा हळेमणी यांच्या ताब्यातून ९ किलो २३६ ग्रॅम वजनाचे हेरॉईन जप्त करण्यात आले.

या मुद्देमालाची किंमत सुमारे ३२ कोटी ३२ लाख ६० हजार रुपये इतकी असल्याचे समोर आले आहे. तसेच आरोपींकडून ३९ हजार रुपयांची रोख रक्कमही जप्त करण्यात आली. या प्रकरणी महात्मा फुले चौक पोलीस ठाण्यात एनडीपीएस कायद्यांतर्गत गुन्हा दाखल करण्यात आला. पुढील तपासात कासिम वसईकर यांच्या घराची झडती घेतली असता आणखी ५३१.६९ ग्रॅम हेरॉईन जप्त करण्यात आले. या मुद्देमालाची किंमत सुमारे १ कोटी ८५ लाख ८५ हजार रुपये असल्याचे पोलिसांनी सांगितले.

सखोल तपासादरम्यान या रॅकेटमागील मुख्य सूत्रधार अमजद युसुफ पठाण असल्याचे निष्पन्न झाले. अमजद पठाण हा कल्याण आणि नाशिक परिसरात अंमली पदार्थांचा पुरवठा करत असल्याची माहिती समोर आली आहे. त्याने गणेशन पुथुस्वामी जंगमार उर्फ अण्णा याला हेरॉईन पुरवल्याचे तपासात उघड झाले. तसेच कासिम वसईकर आणि सद्दाम गफुर शेख हे त्याच्यासाठी ड्रग्स विकण्याचे काम करत होते.

पोलिसांनी या प्रकरणात गणेशन जंगमार याला ५ एप्रिल, सद्दाम शेख याला ६ एप्रिल आणि मुख्य आरोपी अमजद पठाण याला २१ मे २०२६ रोजी अटक केली. न्यायालयाने अमजद पठाण याला १ जून २०२६ पर्यंत पोलीस कोठडी सुनावली आहे. या कारवाईत एकूण ९ किलो ७६८ ग्रॅम हेरॉईन जप्त करण्यात आले असून त्याची अंदाजे किंमत ३४ कोटी १८ लाख ८४ हजार रुपये आहे. या प्रकरणाचा पुढील तपास सुरू असून, या रॅकेटमधील इतर आरोपींचा शोध घेण्यासाठी पोलिसांची कारवाई सुरू आहे.