Kalyan : MIDC च्या भोंगळ कारभाराचा बळी; उघड्या चेंबरमध्ये पडून व्यक्तीचा मृत्यू, कल्याणमधील घटनेनं हळहळ

अभिजीत देशमुख, साम टीव्ही, प्रतिनिधी

एमआयडीसीच्या उघड्या चेंबरमध्ये पडून एका इसमाचा मृत्यू झाल्याची धक्कादायक घटना कल्याण-शीळरोड टाटा पावरजवळ गांधी नगर येथे घडली आहे. रस्त्याने चालत असताना एका इसमाचा पाय घसरला आणि हा इसम थेट उघड्या असलेल्या चेंबरमध्ये पडला. चेंबरमध्ये पडल्यामुळे त्याच्या डोक्याला गंभीर जखम झाली. आजूबाजूच्या लोकांनी या इसमाला उपचारासाठी डोंबिवलीमधील एका खाजगी हॉस्पिटलमध्ये दाखल केली, मात्र उपचारादरम्यान या इसमाचा मृत्यू झाला.

मिळालेल्या माहितीनुसार, बाबू धर्मा चव्हाण असे या मयत इसमाचे नाव आहे. या घटनेमुळे तीव्र संताप व्यक्त होताना दिसतोय. कल्याण शीळ रोडवर या भागात अनेकदा उघड्या चेंबर्सबाबत नागरिकांनी तक्रारी केल्या होत्या. मात्र एमआयडीसी प्रशासनाकडून या प्रश्नांकडे दुर्लक्ष होत आरोप स्थानिक नागरिकांनी केलाय.

कल्याण पूर्वेकडील टाटा नाका गांधीनगर परिसरामध्ये एमआयडीसीचे उघडे चेंबर होते. रविवारी (२० जुलै) या ठिकाणाहून बाबू धर्मा चव्हाण (वय वर्ष साठ) चालत होते. यावेळी चव्हाण यांचा पाय घसरला आणि ते थेट बाजूलाच असलेल्या उघड्या चेंबरमध्ये पडले. एक इसम चेंबरमध्ये पडलाय हे आजूबाजूच्या नागरिकांनी पाहिलं. चव्हाण यांना तातडीने चेंबरच्या बाहेर काढण्यात आलं आणि त्यांना खाजगी हॉस्पिटलमध्ये उपचारासाठी दाखल करण्यात आलं. त्यांच्या डोक्याला गंभीर इजा झाली होती. उपचार सुरू असताना त्यांचा मृत्यू झाला.

या घटनेमुळे नागरिकांनी हॉस्पिटल परिसरामध्ये गर्दी केली होती. संबंधित यंत्रणेच्या निष्काळजीपणामुळे चव्हाण यांचा बळी गेला... आज आमचे वडील गेले उद्या कोणाच्या बाबतीत अशी घटना घडू नये, आम्हाला न्याय पाहिजे अशी मागणी धर्मा चव्हाण यांच्या दोन्ही मुलांनी केली. हे चेंबर कायमच उघड असतं असा आरोप काशिनाथ चव्हाण आणि प्रवीण चव्हाण या त्यांच्या दोन्ही मुलांनी केला. या ठिकाणाहून अनेक गाड्या सुद्धा जात असतात उद्या कोणताही अनुचित प्रकार दुसऱ्याच्या घरी घडू नये अशी अपेक्षा या ठिकाणी व्यक्त करण्यात आली. तर दुसरीकडे संतप्त नागरिकांनी आम्हाला जोपर्यंत न्याय मिळत नाही तोपर्यंत मृतदेह ताब्यात घेणार नाही अशी भूमिका या ठिकाणी मांडली आहे. याबाबत माजी उपमहापौर मोरेश्वर भोईर यांनी एमआयडीसी प्रशासनाविरोधात संताप व्यक्त केला आहे.