Pune Crime: पुणे हादरले! ७ वर्षांच्या मुलीवर बलात्कार, ऊसतोड कामगाराचं भयंकर कृत्य

Summary:

• पुण्यात ७ वर्षीय मुलीवर बलात्कार करण्यात आला

• पुणे जिल्ह्यातल्या जुन्नर तालुक्यातील ओतूर येथे ही घटना घडली

• शेजारी राहणाऱ्या ऊसतोड कामगाराने हे भयंकर कृत्य केले

• याप्रकरणी आरोपीला पोलिसांनी बेड्या ठोकल्या

रोहिदास गाडगे, पुणे

पुणे जिल्ह्यामध्ये ७ वर्षांच्या मुलीवर बलात्कार करण्यात आल्याची धक्कादायक घटना घडली. जुन्नर तालुक्यातील ओतुर येथे ही घटना घडली. ऊसतोड कामगाराने हे भयंकर कृत्य केले. या प्रकरणी ओतूर पोलिसांनी आरोपीविरोधात गुन्हा दाखल करत त्याला बेड्या ठोकल्या आहेत. या घटनेमुळे पुणे जिल्ह्यात खळबळ उडाली. या घटनेमुळे ऊसतोड कामगारांच्या मुलींच्या सुरक्षेचा मुद्दा पुन्हा एकदा चर्चेत आला आहे.

मिळालेल्या माहितीनुसार, जुन्नर तालुक्यातील ओतूर येथे ही संतापजनक घटना घडली. ७ वर्षीय अल्पवयीन मुलीवर ऊसतोड कामगाराने बलात्कार केला. ही घटना मंगळवारी संध्याकाळी उघडकीस आही. शेजारी राहणाऱ्या व्यक्तीनेच हे भयंकर कृत्य केले. देवीदास रोहीदास गर्जे असं आरोपीचे नाव असून तो देखील ऊसतोड कामगार आहे. या प्रकरणी ओतूर पोलिसांनी देवीदासला अटक केली.

पीडित मुलीवर बलात्कार झाल्याचे कळताच तिच्या आई-वडिलांच्या पायाखालची जमीन सरकली. हे कृत्य कोणी केले असता मुलीने शेजारी राहणाऱ्या देवीदासचे नाव घेतले. त्यानंतर मुलीच्या आई-वडिलांनी ओतूर पोलिस ठाण्यात धाव घेत देवीदासविरोधात तक्रार दाखल केली. ओतूर पोलिसांनी तात्काळ कारवाई करत आरोपीला अटक केली.

पोलिसांनी मुलीला पुण्यातील शासकीय रुग्णालयात वैद्यकीय तपासणीसाठी पाठवलं असून या घटनेनंतर परिसरात काही काळ तणाव निर्माण झाला होता. परिस्थिती नियंत्रणात आणण्यासाठी पोलिसांनी मोठा बंदोबस्त तैनात करून शांतता प्रस्थापित केली. या घटनेमुळे ऊसतोड कामगारांच्या वस्त्यांतील मुलींच्या सुरक्षेचा मुद्दा पुन्हा एकदा ऐरणीवर आला असून समाजमनात संतापाची लाट उसळलीय. या प्रकरणाचा पुढील तपास ओतूर पोलिसांकडून सुरू आहे.