मोठी बातमी: यंदा शिया मुस्लिम समाज ईद साजरी करणार नाही! नेमकं कारण काय?

सागर आव्हाड, प्रतिनिधी

why Shia Muslims decided to celebrate Eid simply this year global news : गेल्या काही दिवसांपासून इराण, अमेरिका आणि इस्रायल यांच्यात सुरू असलेल्या युद्धाचे पडसाद जगभरात उमटत आहेत. इराणने 'हार्मुस बंदर' (Strait of Hormuz) बंद केल्यामुळे गॅसचा तुटवडा निर्माण झाला आहे. भारतात व्यावसायिक गॅसचा पुरवठा विस्कळीत झाला आहे. तर घरगुती गॅस मिळवण्यासाठी सर्वसामान्यांना मोठा संघर्ष करावा लागत आहे. अशातच पवित्र रमजान महिना संपत आला असून दोन दिवसांवर ईद आली आहे. मात्र, अमेरिका आणि इस्रायलच्या हल्ल्यात इराणचे सर्वोच्च नेते रहेबर सय्यद अली खामनाई शहीद झाल्याने जगभरातील मुस्लिम समाजात संतापाची लाट आहे. या पार्श्वभूमीवर, यंदाची रमजान ईद साध्या पद्धतीने साजरी करण्याचा निर्णय घेण्यात आला आहे.

दरवर्षी रमजान ईदच्या दिवशी नमाज, नवीन कपडे आणि शिरखुर्मा असा मोठा उत्साह असतो. मात्र, शिया मुस्लिम समाजाचे प्रमुख रहेबर सय्यद अली खामनाई यांच्या शहादतीमुळे यंदा हा समाज शोक व्यक्त करत आहे. शिया मुस्लिम समाजाच्या वतीने यंदा रमजान ईद साध्या पद्धतीने साजरा केली जाणार असल्याचं निर्णय घेण्यात आलं आहे.

शिया मुस्लिम धर्मगुरू मौलाना शबीह एहसन काझमी म्हणाले की, "हे युद्ध इराणवर लादण्यात आले असून इस्रायल आणि अमेरिकेचा हा दहशतवाद आहे. या युद्धात अनेक निष्पाप बालकांचा बळी गेला आहे. खामनाई यांच्या निधनामुळे सर्वत्र दुःखाचे वातावरण असून इस्रायल आणि अमेरिकेचा क्रूर चेहरा जगासमोर आला आहे."

या दुःखद प्रसंगामुळे शिया समाजाने यंदा ईद साधेपणाने साजरी करण्याचा निर्णय घेतला आहे. कोणीही नवीन कपडे परिधान करणार नाही किंवा गोड पदार्थ बनवणार नाही. केवळ ईदची नमाज अदा केली जाईल, असेही त्यांनी स्पष्ट केले.