Railway News : कोकणवासियांसाठी खुशखबर! गणेशोत्सवासाठी २ विशेष रेल्वेची घोषणा, कुठून कधी धावणार? जाणून घ्या संपूर्ण वेळापत्रक

अनेकदा गणेशोत्सव काळात गावी जाण्यासाठी प्रवासी रेल्वेचा मार्ग अवलंबतात. मात्र तिकिटाच्या गैरसोयींमुळे रेल्वेने जाण्याची त्यांची संधी हुकते. यामुळे दरवर्षी सरकारकडून अतिरिक्त गाड्या सोडल्या जातात. यंदाही कोकणात गावी जाताना प्रवाशांची गैरसोय होऊ नये म्हणून रेल्वेने विशेष गाड्या सोडल्या आहेत. त्यानुसार मडगाव - लोकमान्य टिळक टर्मिनस आणि चिपळूण पनवेल अनारक्षित अशा २ गाड्यांच्या फेऱ्या चालवण्यात येणार आहेत. रेल्वेच्या या निर्णयामुळे सर्वसामान्य नागिरकांना दिलासा मिळाला असून गर्दीची कटकट आता कायमची संपली आहे. या ट्रेनचं शेड्युल पुढील प्रमाणे असेल.

मडगाव-एलटीटी स्पेशल

कोकण रेल्वेच्या माहितीनुसार, मडगाव -LTT ही रेल्वे १५ आणि १८ सप्टेंबर रोजी मडगाववरून दुपारी ४ वाजता सुटेल आणि दुसऱ्या दिवशी सकाळी ६ वाजता लोकमान्य टिळक टर्मिनसला पोहोचेल. पुन्हा परत येताना ती रेल्वे १६ आणि १९ सप्टेंबर रोजी एलटीटीवरून सकाळी ७ वाजता रवाना होईल आणि रात्री ११:४५ च्या दरम्यान गंतव्य स्थानापर्यंत पोहचेल. ही रेल्वे एकूण १९ डब्ब्यांची असणार आहे. तसेच तिकीट बुकिंग करायची झाल्यास त्याचे आरक्षण येत्या ८ सप्टेंबरपासून प्रवाशांना करता येणार आहे.

चिपळूण-पनवेल मेमूची सुविधा

मडगाव - LTT सोबतच दुपारच्या सुमारास चिपळूण ते पनवेलदरम्यान अनारक्षित मेमू लोकल चालवण्यात येणार आहे. ही मेमू १० ते १४ सप्टेंबर आणि १८ ते २७ सप्टेंबर दरम्यान चिपळूणवरून सकाळच्या सुमारास ९ वाजता सुटेल आणि दुपारी २:३० वाजता पनवेलला पोहचेल. पनवेलवरून ही रेल्वे परतीच्या प्रवासासाठी ३:३० ला निघेल आणि रात्री १०:२० पर्यंत गंतव्य स्थानकावर पोहोचेल.

रेल्वेचे थांबे पुढील प्रमाणे

चिपळूणवरून सुटणारी पनवेल मेमू रेल्वे ही अंजनी, खेड, कळंबणी बुद्रुक, दिवाणखवटी, विन्हेरे, करंजाडी, सापे वामने, वीर, गोरेगाव रोड, माणगाव, इंदापूर, कोलाड, रोहा आणि पेण या स्थानकांवर थांबेल. त्यामुळे चिपळूण ते पनवेल दरम्यान प्रवास करणाऱ्या प्रवाशांना दिलासा मिळाला आहे. तसेच या मेमूचा सर्वाधिक फायदा स्थानिक नागरिकांना होणार आहे. गणेशोत्सवासाठी सुरु केलेली ही रेल्वे प्रवाशांसाठी नियमित करावी अशी मागणी नागरीकांकडून होत आहे.