भाजप मोहित कंबोज यांना राज्यपाल नियुक्त आमदार करणार?; 'या' नेत्यांना मिळणार संधी

मुंबई: राज्यात महाविकास आघाडी (Mahavikas Aghadi) कोसळत नवे शिंदे-फडणवीस सरकार स्थापन झाले आहे. शिवसेनेचे ज्येष्ठ नेते एकनाथ शिंदे यांनी ४० आमदारांसह बंड केले होते, त्यामुळे महाविकास आघाडीचे सरकार अडचणीत आले होते. राज्यपाल भगतिंह कोश्यारी यांनी विधानसभा अध्यक्ष पदाच्या निवडणुकीसाठी परवानगी दिली. काल भाजपच्या (BJP) राहुल नार्वेकर यांना १६४ मत मिळाली. आता शिंदे-फडणवीस सरकार राज्यपाल यांना १२ आमदार नियुक्तीसाठी यादी देणार असल्याचे बोलले जात आहे.

राज्यपाल नियुक्त आमदारांच्या यादीत मोहित कंबोज यांना स्थान मिळणार असल्याचे बोलले जात आहे. महाविकास आघाडी सरकार पाडण्यात त्यांचा मोठा हात असल्याचे बोलले जात आहे. मोहित कंबोज हे बंडखोर आमदारांसोबत सुरत तसेच गुवाहाटीमध्येही होते.

ठाकरे सरकार पाडण्यामागे मोहित कंबोज यांनी महत्वाची भूमिका बजावली होती, याचमुळे मोहित कंबोज यांना आमदारकीची लॉटरी लागण्याची शक्यता वर्तवली जात आहे. मोहित कंबोज यांच्यासोबत पंकजा मुंडे यांनाही आमदारकी मिळण्याची शक्यता वर्तवली जात आहे. तसेच भाजपमध्ये अन्य नेत्यांची नावेही चर्चेत आहेत.

भाजपमधील या नेत्यांच्या नावांची चर्चा

पंकजा मुंडे, हर्षवर्धन पाटील, सदाभाऊ खोत, चित्रा वाघ, कृपाशंकर सिंह, मोहित कंबोज, माधव भंडारी, केशव उपाध्ये राज्यपाल नियुक्त आमदारीसाठी या नेत्यांची नावे सध्या चर्चेत आहे.

उद्धव ठाकरेंना मोठा धक्का

शिवसेना आमदार अजय चौधरी यांचे शिवसेना (Shivsena) गटनेते पद रद्द करण्यात आलं आहे. तर सुनील प्रभू यांचे मुख्य प्रतोद पद रद्द करण्यात आले आहे, अशी माहिती महाराष्ट्र विधानमंडळ सचिवालयाचे उप सचिवालयचे शिवदर्शन साठ्ये यांनी दिली आहे.

उद्धव ठाकरे यांनी एकनाथ शिंदे (Eknath Shinde) यांनी बंडखोरी केल्यानंतर त्यांच्या पक्षातर्फे शिंदेवर मोठी कारवाई केली होती. उद्धव ठाकरेंनी (Uddhav Thackeray) एकनाथ शिंदे यांना शिवसेनेच्या गटनेतेपदावरून हटवलं होतं. त्यांच्याजागी आमदार अजय चौधरी यांची गटनेते म्हणून नियुक्ती केली होती. त्यानंतर राज्य विधिमंडळाने देखील अजय चौधरी यांच्या गटनेते पदी अधिकृत नियुक्ती करण्याच्या विनंतीला मान्यता दिली होती. मात्र, राज्यात शिंदे सरकार सत्तेवर येताच शिंदे गटाला मोठा दिलासा मिळाला आहे.