धक्का लागल्याने सटकली; रागाच्या भरात हॉटेलबाहेर धारदार शस्त्राने तरुणाची हत्या, डोंबिवलीत खळबळ

संघर्ष गांगुर्डे, साम टीव्ही

डोंबिवलीतील मालवण किनारा हॉटेलसमोर शनिवारी रात्री उशिरा एक धक्कादायक घटना घडली आहे. हॉटेलमधून बाहेर पडताना किरकोळ धक्का लागला. त्यानंतर दोन तरुणांमध्ये झालेल्या वादातून एका तरुणाची धारदार शस्त्राने हत्या करण्यात आली आहे. या घटनेने डोंबिवली परिसरात खळबळ उडाली आहे.

मिळालेल्या माहितीनुसार, मृत तरुणाचे नाव आकाश सिंग असे आहे. तो नवी मुंबई येथे कॉल सेंटरमध्ये काम करत होता. हॉटेलमधून बाहेर पडताना त्याचा एका दुसऱ्या तरुणासोबत किरकोळ धक्का लागला. या क्षुल्लक कारणावरून वाद वाढला आणि त्या तरुणाने आपल्या साथीदारासह आकाशवर हल्ला चढवला.

हल्ल्यात धारदार शस्त्राचा वापर करण्यात आला आहे. हल्ल्यात गंभीर जखमी झालेल्या आकाशचा घटनास्थळीच मृत्यू झाला. या प्रकरणी मानपाडा पोलिसांनी हत्या गुन्हा नोंदवला आहे. पोलिसांनी आरोपींची ओळख पटविण्याचे आणि त्यांचा शोध घेण्याचे काम सुरू आहे.

या घटनेने डोंबिवली परिसरात एकच खळबळ उडाली आहे. पोलिसांनी परिसरातील सीसीटीव्ही फुटेज जप्त करून तपासाची चक्रे वेगाने फिरवली आहेत. पुढील तपास पोलीस करत आहेत.