Pooja Khedkar case : खेडकर कुटुंबियांच्या अडचणीत भर; पूजा यांच्याकडून अटक टाळण्यासाठी कोर्टात जामीन अर्ज, वडिलांवरही गुन्हा

प्रमोद जगताप, अक्षय बडवे, साम टीव्ही प्रतिनिधी

पुणे : पूजा खेडकर यांच्या कुटुंबियांच्या अडचणीत दिवसेंदिवस भर पडत आहे. पूजा खेडकर यांच्या आईला काही दिवसांपूर्वी जामीन मिळाला. त्यानंतर आता पूजा यांच्या वडिलांवरही गुन्हा दाखल झाला आहे. तर पूजा यांनीही अटक टाळण्यासाठी दिल्ली हायकोर्टात अटकपूर्व जामिनासाठी अर्ज केला आहे. या प्रकरणात पूजा खेडकर यांचं संपूर्ण कुटुंब अडचणीत सापडलं आहे.

पूजा खेडकर यांच्या अडचणी वाढल्या आहेत. यूपीएससीच्या तक्रारीवरून दिल्ली पोलिसांनी पूजा खेडकर यांच्यावर गुन्हा दाखल केला होता. त्यानंतर हा गुन्हा दिल्ली गुन्हे शाखेकडे वर्ग करण्यात आला. या प्रकरणी गुन्हे शाखेने अटक करू नये, यासाठी पूजा खेडकर यांनी दिल्ली उच्च न्यायालयात अटकपूर्व जामिनासाठी अर्ज केला आहे.

पूजा खेडकर यांचा अटकपूर्व जामीन मंजूर होणार का?

पूजा खेडकर यांनी दिल्ली उच्च न्यायालयात अटकूपूर्व जामीन मिळावा, यासाठी याचिका दाखल केली आहे. या याचिकेवर आज दिल्ली उच्च न्यायालयात सुनावणी होणार आहे. न्यायमूर्ती सुब्रमण्यम प्रसाद सिंगल यांच्यासमोर सुनावणी होणार आहे.

पटियाला हाऊस कोर्टाने १ ऑगस्ट रोजी पूजा यांचा जामीन फेटाळला होता. त्यानंतर पूजा खेडकर यांनी दिल्ली हायकोर्टात धाव घेतली आहे. पटियाला हाऊस कोर्टाचा निर्णय दिल्ली उच्च न्यायालय कायम ठेवत की पूजा खेडकर यांना दिलासा देत हे पाहणं महत्वाचं ठरणार आहे.

पूजा खेडकर यांच्या वडिलांवर गुन्हा

पूजा खेडकर यांचे वडील दिलीप खेडकर विरोधात पुण्यात गुन्हा नोंदवण्यात आला आहे. सरकारी कामकाजात अडथळा आणल्याची तक्रारीनंतर गुन्हा दाखल करण्यात आला आहे. पुण्यातील बंडगार्डन पोलीस ठाण्यात हा गुन्हा दाखल करण्यात आला आहे.

दिलीप खेडकर यांच्याविरुद्ध सरकारी कामकाजात अडथळा आणल्याची तक्रार बुधवारी पोलिसांकडे देण्यात आली होती. पूजा खेडकर पुणे जिल्हाधिकारी कार्यालयात प्रशिक्षणार्थी आयएएस अधिकारी म्हणून कार्यरत होत्या. दिलीप खेडकर यांनी जिल्हाधिकारी कार्यालयात पूजा यांना स्वतंत्र केबिन द्यावे, यासाठी जिल्हाधिकारी कार्यालयातील अधिकाऱ्यांवर दबाव आणला होता.