Ajit Pawar: अजित पवारांचा फोन मुख्यमंत्र्यांनी उचलला नाही, काय आहे कारण?

एक मोठी राजकीय बातमी समोर आली आहे. उपमुख्यमंत्री अजित पवार यांनी बैठक सुरु असताना मुख्यमंत्री एकनाथ शिंदे यांना फोन केला होता. मात्र अजित पवारांचा फोन मुख्यमंत्री शिंदे यांनी उचलला नाही.

मिळालेल्या माहितीनुसार, पुणे जिल्हा नियोजन समितीच्या बैठकीतून अजित पवार यांनी मुख्यमंत्री एकनाथ शिंदे यांना फोन केला होता. खासदारांच्या प्रश्नासाठी अजित पवार यांनी फोन केला होता, असं सांगण्यात येत आहे. या बैठकीचा व्हिडिओही समोर आला आहे. ज्यात अजित पवार मुख्यमंत्री शिंदे यांना फोन करत असल्याचं दिसत आहे. या बैठकीला शरद पवार हे देखील उपस्थित होते.

'बारामती, शिरूरला निधी दिला जात नाही', सुप्रिया सुळे, कोल्हेंची अजित पवार यांच्याकडे तक्रार

दरम्यान, बारामती आणि शिरुरला निधी दिला जात नसल्याची नाराजी सुप्रिया सुळेंनी पुणे जिल्हा नियोजन बैठकीत व्यक्त केलीय. मावळला निधी दिला जातो तोच न्याय बारामती आणि शिरुरला देण्याची मागणी सुळेंनी अजित पवारांकडे केलीय. मात्र आचारसंहिता असल्यामुळे निधी देता आला नाही असं उत्तर अजित पवारांनी दिलं.

तर दुसरीकडे अजित पवारांचे आमदार सुनील शेळके मात्र बैठकीत आक्रमक झाल्याचं पाहायला मिळालंय. बैठकीत सुप्रिया सुळे आणि सुनील शेळकेंमध्ये जुंपल्याचं पाहायला मिळालंय. आमच्या मतदारसंघात जास्त निधी मिळतो तर तुम्ही नाराज होण्याचं कारण काय असा सवाल शेळकेंनी विचारलाय.