Sunday Megablock : रविवारी प्रवाशांचे होणार मेगा हाल, 'या' मार्गावर असणार मेगा ब्लॉक; घराबाहेर पडण्याआधी वाचा वेळापत्रक

प्रवाशांसाठी अत्यंत महत्त्वाची बातमी! मध्य रेल्वेच्या अभियांत्रिकी आणि देखभाल कामांच्या अंमलबजावणीसाठी रविवार ५ एप्रिल रोजी आपल्या उपनगरीय मार्गांवर मेगा ब्लॉक जारी करण्यात आला आहे. हा मेगा ब्लॉक हार्बर आणि ट्रान्स-हार्बर मार्गावर घेण्यात येणार आहे. यामुळे येत्या रविवारी प्रवाशांचे मेगा हाल होण्याची शक्यता आहे. त्यामुळे घराबाहेर पडण्याआधी पुढील वेळापत्रक वाचा.

मध्य रेल्वेने अभियांत्रिकी आणि देखभाल कामांच्या अंमलबजावणीसाठी हार्बर मार्गावर पनवेल आणि वाशी स्थानकांदरम्यान सकाळी ११.०५ ते सायंकाळी ४.०५ वाजेपर्यंत अप व डाऊन हार्बर मार्गावर मेगा ब्लॉक घेण्यात येणार आहे. यादरम्यान पनवेल येथून सकाळी १०:३३ ते दुपारी ३:४९ या वेळेत छत्रपती शिवाजी महाराज टर्मिनसच्या दिशेने सुटणाऱ्या 'अप' हार्बर मार्ग सेवा, आणि छत्रपती शिवाजी महाराज टर्मिनस येथून सकाळी ९:४५ ते दुपारी ३:१२ या वेळेत पनवेल-बेलापूरच्या दिशेने सुटणाऱ्या 'डाऊन' हार्बर मार्ग सेवा रद्द राहतील.

ट्रान्स-हार्बर मार्गावर पनवेलहून ठाण्याच्या दिशेने जाणारी सकाळी ११:०२ ते दुपारी ३:५३ या वेळेत पनवेल येथून सुटते आणि ठाणे येथून पनवेलच्या दिशेने जाणारी 'डाऊन' ट्रान्स-हार्बर मार्ग सेवा जी सकाळी १०:०१ ते दुपारी ३:२० या वेळेत ठाण्याहून सुटते, या रद्द राहतील. ब्लॉक कालावधीत छत्रपती शिवाजी महाराज टर्मिनस मुंबई – वाशी विभागावर विशेष उपनगरीय गाड्या चालवण्यात येतील.

ब्लॉक कालावधीत ठाणे-वाशी/नेरुळ स्थानकांदरम्यान ट्रान्स-हार्बर मार्गावरील सेवा उपलब्ध असतील.पायाभूत सुविधांची देखभाल आणि सुरक्षिततेसाठी हे 'मेगा ब्लॉक' अत्यंत आवश्यक आहेत. यामुळे होणाऱ्या गैरसोयीबद्दल रेल्वे प्रशासनाने दिलगिरी व्यक्त केली आहे.