Political News : मुंबईतील शिंदेसेनेच्या पदाधिकाऱ्याला जीवे मारण्याची धमकी, राजकीय वर्तुळात खळबळ

मयूर राणे, मुंबई

मुंबईच्या राजकीय वर्तुळातून मोठी बातमी समोर आली आहे. विक्रोळी पूर्व येथील टागोर नगर, ग्रुप क्रमांक ८ परिसरात युवासेना पदाधिकारी गणेश गौतम रोकडे यांना जीवे मारण्याची धमकी देण्यात आली आहे. २६ सप्टेंबर रोजी दुपारी सुमारे २.३० ते ३ वाजण्याच्या दरम्यान भारत गॅस परिसरात हा प्रकार घडल्याचे सांगण्यात येत आहे. या घटनेनंतर परिसरात चर्चेला उधाण आले आहे.

मिळालेल्या माहितीनुसार, गणेश रोकडे हे मागील वर्षभरापासून विक्रोळी परिसरातील कथित ड्रग्सविरोधी कारवायांसंदर्भात संबंधित यंत्रणांकडे तक्रारी करत असून, त्याबाबत सातत्याने पाठपुरावा करत आहेत. त्यांच्या तक्रारींच्या आधारे संबंधित यंत्रणांकडून कारवाईही करण्यात आल्याचे सांगितले जात आहे. मात्र, याच पार्श्वभूमीवर रोकडे यांना जीवे मारण्याची धमकी देण्यात आल्याची माहिती समोर आली आहे.

धमकीची घटना समोर आल्यानंतर रोकडे यांनी या प्रकरणाची माहिती पोलिसांना दिली. घटनेचे गांभीर्य लक्षात घेत विक्रोळी पोलिसांनी तातडीने दखल घेत तपास सुरू केला. धमकी देणाऱ्या व्यक्तीचा शोध घेत पोलिसांनी एका संशयित व्यक्तीला ताब्यात घेतल्याची माहिती आहे. या प्रकरणी पोलिसांकडे तक्रारही नोंद करण्यात आली असून, धमकी देण्यामागील नेमके कारण काय आहे, याचा तपास सुरू आहे.

दरम्यान, संबंधित व्यक्तीचा या घटनेतील नेमका सहभाग, धमकीचे कारण तसेच या प्रकरणामागे आणखी कोणाचा सहभाग आहे का, याबाबत पोलिसांकडून चौकशी केली जात आहे. तसेच रोकडे यांनी यापूर्वी केलेल्या ड्रग्सविरोधी तक्रारी आणि सद्य घटनेचा काही संबंध आहे का, या दिशेनेही तपास केला जात असल्याचे समजते. या घटनेमुळे विक्रोळी परिसरात सुरक्षेचा प्रश्न उपस्थित झाला आहे. पोलिसांच्या तपासानंतर या प्रकरणातील अधिक माहिती आणि धमकीमागील कारण स्पष्ट होण्याची शक्यता आहे.