डोंबिवलीत क्रिकेट मैदानासाठी भाजप-शिवसेना शिंदे गट आक्रमक; काय आहे संपूर्ण प्रकरण?

संघर्ष गांगुर्डे, साम टीव्ही

डोंबिवली पश्चिमेतील ठाकुर्ली येथील बावनचाळ परिसरात अनेक वर्षांपासून स्थानिक खेळाडूंच्या सरावासाठी वापरल्या जाणाऱ्या क्रिकेट मैदानाच्या प्रश्नावर आता राजकीय वातावरण तापलंय. मैदानावर रेल्वे प्रशासनाने काम सुरू केल्याने खेळाडूंना क्रिकेट खेळण्यास मज्जाव करण्यात आला आहे. आता याविरोधात खेळाडू, नागरिक, भाजप आणि शिंदे शिवसेना आक्रमक झालेत.

मैदानावर अनेक वर्षांपासून परिसरातील खेळाडू क्रिकेटचा सराव करतात. रेल्वेकडून मैदानाच्या परिसरात काम सुरू करण्यात आलंय आहे. त्यामुळे खेळाडूंना या मैदानात क्रिकेट खेळता येत नाही. त्यामुळे संतप्त खेळाडूंनी मैदानावर आंदोलन करत आम्हाला मैदानात खेळू द्या, अशी मागणी केली. आंदोलनात सहभागी झालेल्या भाजप आणि शिंदे शिवसेनेच्या पदाधिकाऱ्यांनी रेल्वे प्रशासनाविरोधात जोरदार घोषणाबाजी केली.

'मैदान आम्ही कोणत्याही परिस्थितीत सोडणार नाही, असा इशारा राजकीय नेत्यांनी दिला आहे. तसेच स्थानिकांच्या भावनांचा विचार करण्याची मागणी करण्यात आलीये. या मैदानावर अजिंक्य रहाणे आणि निलेश कुलकर्णी सारख्या मोठे खेळाडूंनी देखील सुरुवातीच्या काळात सराव केला आहे.

'मैदान अनेक वर्षांपासून खेळाडूंसाठी उपलब्ध आहे. स्थानिक भूमिपुत्रांनी विकासासाठी जमिनी दिल्या आहेत. त्या बदल्यात नागरिकांना मिळालेल्या सुविधा हिरावून घेण्याचा प्रयत्न सहन केला जाणार नाही, असं भाजप नगरसेवक दीपेश म्हात्रे यांनी सांगितले. दोन दिवसांपूर्वी भाजप प्रदेशाध्यक्ष रवींद्र चव्हाण यांनी या मैदानाची पाहणी केली आहे. या प्रकरणात रेल्वे डीआरएम सी चर्चा देखील होणार आहे.

आमदार राजेश मोरेंनी मैदान वाचवण्यासाठी लढा सुरूच राहील, असे स्पष्ट केलंय. पुढील दोन दिवसांत रेल्वेच्या विभागीय रेल्वे व्यवस्थापक यांची भेट घेऊन या प्रश्नावर चर्चा करण्यात येणार आहे. खेळाडूंना न्याय मिळवून देण्यासाठी सर्वतोपरी प्रयत्न केले जातील, असेही त्यांनी सांगितले.