Shivsena : ठाकरे गटाला मोठा धक्का! बड्या नेत्याला खंडणीच्या आरोपाखाली अटक, शिवसैनिक आक्रमक

संजय गडदे, साम टीव्ही

Shivsena Ex Corporator Yogesh Bhoir Arrested : मुंबईच्या पश्चिम उपनगरातील कांदिवली परिसरातील शिवसेना उद्धव बाळासाहेब ठाकरे गटाचे (Uddhav Thackeray)  माजी नगरसेवक योगेश भोईर यांना क्राइम ब्रांच युनिट 11 ने अटक केली आहे. खंडणी आणि सावकारी कायद्यानुसार योगेश भोईर यांच्या विरोधात गुन्हा दाखल झाल्यानंतर आज रात्री त्यांना अटक करण्यात आली आहे. हा ठाकरे गटासाठी एक मोठा धक्का मानला जात आहे. (Latest Marathi News)

योगेश भोईर हे शिवसेना उद्धव बाळासाहेब ठाकरे गटाचे कांदिवली भागातील उपविभाग प्रमुख असून ते माजी नगरसेवक देखील आहेत यापूर्वी त्यांच्यावर समता नगर पोलीस ठाण्यामध्ये विकासकांकडून 2 कोटीची खंडणी मागितल्या प्रकरणी गुन्हा दाखल झाला होता.

मंगळवारी (27 डिसेंबर) त्यांना या प्रकरणी जामीन देखील मंजूर झाला होता. परंतू एका जुन्या गुन्ह्यातील प्रकरणाचा गुन्हा क्राईम ब्रँच 11 कडे दाखल होता. तब्बल चार तास चौकशी करण्यात आल्यानंतर अखेरीस रात्री सव्वानऊ वाजण्याच्या सुमारास योगेश भोईर यांना अटक करण्यात आली आहे.   (Maharashtra Political News)

दरम्यान, माजी नगरसेवक योगेश भोईर यांना क्राइम ब्रांच युनिट 11 ने अटक करताच, याविरोधात शिवसैनिक प्रचंड आक्रमक झाले. त्यांनी क्राईम ब्रँच युनिट बाहेर जोरदार घोषणाबाजी करत विरोध दर्शवला.

कायदा सुव्यवस्थेचा प्रश्न निर्माण होऊ नये यासाठी रात्री योगेश भोईर यांना साउथ मुंबईतील क्राइम ब्रांच कार्यालयात हलवण्यात आले. उद्या त्यांना 11 वाजता किल्ला कोर्टात हजर करण्यात येईल.

Edited By - Satish Daud