Bhiwandi News: गाणी लावण्यावरून २ गटात वाद, हॉटेलमध्ये तुंबळ हाणामारी अन् गोळीबार; ११ जणांना अटक, थरारक VIDEO व्हायरल

• भिवंडीच्या त्विशा हॉटेलमध्ये गाण्यावरून दोन गटांत तुंबळ हाणामारी

• हॉटेलमध्ये एका गटाकडून गोळीबार तर दुसऱ्या गटाकडून चॉपर हल्ला

• भिवंडी हॉटेल हाणामारी प्रकरणात ११ जणांना अटक

फैय्याज शेख, भिवंडी

भिवंडीतील हॉटेलमध्ये गाणं बदलण्यावरून झालेल्या वादात थेट पिस्टलमधून गोळीबार आणि चॉपरने हल्ला झाल्याची धक्कादायक घटना समोर आली आहे. मुंबई-नाशिक महामार्गावरील सोनाळे येथील त्विशा हॉटेलमध्ये मध्यरात्री दोन गटांमध्ये तुफान राडा झाला. सुरुवातीला गाण्यावरून झालेल्या शाब्दिक वादाचे रूपांतर हाणामारीत झाले आणि त्यानंतर एका गटाकडून पिस्टलमधून गोळीबार करण्यात आला तर दुसऱ्या गटाकडून चॉपरने हल्ला करण्यात आल्याचा आरोप आहे. या संपूर्ण राड्याचा सीसीटीव्ही व्हिडिओ सोशल मीडियावर व्हायरल झाला आहे. या प्रकरणी भिवंडी तालुका पोलिसांनी दोन्ही गटांतील एकूण ११ आरोपींना अटक केली आहे.

मिळालेल्या माहितीनुसार, भिवंडी तालुक्यातील सोनाळे येथील त्विशा हॉटेलमध्ये मध्यरात्री हा प्रकार घडला. हॉटेलमध्ये मुसा भाईचे गाणे सुरू असताना एका गटाने ते बंद करून मराठी गाणे लावण्यास सांगितले. मात्र, यावरून दुसऱ्या गटासोबत वाद सुरू झाला. साऊंड बॉक्स उचलून दुसऱ्या टेबलाजवळ नेण्यावरून वाद आणखीन चिघळला. सुरुवातीला शाब्दिक बाचाबाची आणि शिवीगाळ झालीा त्यानंतर दोन्ही गटांनी एकमेकांना लाथाबुक्क्यांनी मारहाण करण्यास सुरुवात केली.

वाद विकोपाला गेल्यानंतर एका गटातील साईनाथ पाटीलने कमरेला लावलेले पिस्टल बाहेर काढून समोरच्या गटाच्या दिशेने गोळीबार केल्याचा आरोप आहे . तर दुसऱ्या गटाच्या तक्रारीनुसार, चॉपर काढून हल्ला करण्यात आला. या झटापटीत काही जण जखमी झाले. हॉटेलमधील हा संपूर्ण थरार सीसीटीव्ही कॅमेऱ्यात कैद झाला असून त्याचा व्हिडिओ आता सोशल मीडियावर व्हायरल होत आहे. या घटनेमुळे हॉटेलमध्ये आलेल्यांमध्ये भीतीचे वातावरण होते.

या घटनेप्रकरणी भिवंडी तालुका पोलिस ठाण्यात दोन्ही गटांकडून परस्परविरोधी दोन गुन्हे दाखल करण्यात आले आहेत. पहिल्या गुन्ह्यात ५ जणांची नावे, तर दुसऱ्या गुन्ह्यात ३ आरोपींसह सात ते आठ अनोळखी व्यक्तींचा उल्लेख आहे. या दोन्ही प्रकरणांत पोलिसांनी एकूण 11 आरोपींना अटक केली आहे. गाणी लावण्याच्या वादातून सुरू झालेल्या हाणामारीत थेट गोळीबार आणि चॉपर हल्ला झाल्याने भिवंडीत एकच खळबळ उडाली असून या प्रकरणाचा पुढील तपास भिवंडी तालुका पोलिस करत आहेत.