AnandRao Adsul vs Navneet Rana : नवनीत राणांचा भाजपमध्ये प्रवेश, लोकसभा उमेदवारीही मिळाली, अडसूळ संतापले

पराग ढोबळे, नागपूर

amravati lok sabha constituency Politics :

अमरावती लोकसभेच्या जागेवरून महायुतीच्या जागेवरून शिंदे गटाचे नेते आनंदराव अडसूळ यांनी पुन्हा एकदा भाजप नेत्या नवनीत राणा यांच्यावर निशाणा साधला आहे. नवनीत राणा यांनी काल नागपुरात भाजपमध्ये प्रवेश केला. या पक्षप्रवेशावरून आनंद अडसूळ यांनी टीका केली. 'चोर रात्रीच्या अंधारातच येतात, अशा शब्दात आनंदराव अडसूळ यांनी नाव न घेता नवनीत राणा यांच्यावर टीका केली. (Latest Marathi News)

नवनीत राणा यांनी नागपुरात येऊन पक्षप्रवेश केला. यावरून शिंदे गटाचे नेते आनंदराव अडसूळ (Anandroa Adsul) यांनी तीव्र प्रतिक्रिया दिली. 'चोर रात्रीच्या अंधारातच येतात आणि घाई गडबडीने येतात. एवढेच नाही तर, यवतमाळ वाशिम लोकसभा मतदारसंघातून भावना गवळी यांनाच उमेदवारी मिळेल'.

अमरावतीमधून नवनीत राणा विरोधात उमेदवारी अर्ज दाखल करणार का, या प्रश्नावर अडसूळ यांनी सूचक प्रतिक्रिया दिली. अमरावतीमधून उमेदवारी अर्ज दाखल करायचं की नाही हे अजून ठरवलेलं नाही. आणखी दोन-तीन दिवस वाट पाहणार आहे. कारण कोर्टाचा निर्णय यायचा आहे. त्यावर सर्व अवलंबून राहील, असे अडसूळ म्हणाले. 'जे घडायचे असते ते कधीही घडू शकते.. घाई केली म्हणून ते कायम राहतीलच, असं नाही, असेही अडसूळ म्हणाले.

दरम्यान, शिवसेनेच्या जागा मिळवण्यासाठी भाजपने खोट्या सर्व्हेक्षणाचा आधार घेतला, या प्रश्नावर अडसूळ यांनी माझ्या बाबतीत शक्यतो असे घडलेले नाही. मी या आरोपांबद्दल ही ऐकले आहे. मात्र, त्यात किती तथ्य आहे. मला माहीत नाही. जेव्हा उमेदवारी द्यायची नसते, तेव्हा सर्व्हेचा कारण सांगून उमेदवारी नाकारली जाते, असे मत अडसूळ यांनी व्यक्त केले. यवतमाळ वाशीममध्ये भावना गवळी हेच उमेदवार राहणार आहे. कदाचित उद्या शिवसेनेचे उमेदवार जाहीर केले जाऊ शकतात, अशी माहिती ही त्यांनी दिली.