Plane Crash : अपघातग्रस्त विमानातील क्रू मेंबरमध्ये बदलापूरचा तरूण; कुटुंबीय म्हणाले, आमचा देवावर विश्वास, रडून रडून वडिलांचे डोळे सुकले

मयुरेश कडाव, साम टीव्ही, प्रतिनिधी

गुजरातच्या अहमदाबादमध्ये एअर इंडियाचे प्रवासी विमान कोसळले. टेकऑफनंतर अवघ्या काही मिनिटांमध्ये विमान ७०० फूटांवरुन खाली कोसळले. ज्या वेळेस अपघात झाला, तेव्हा विमानामध्ये २४२ जण होते. विमानाच्या क्रू मेंबर्समध्ये बदलापूरच्या दीपक पाठक यांचाही समावेश आहे. आज सकाळीच टेकऑफ करण्यापूर्वी त्यांनी सोशल मीडियावर अपडेट केले होते.

मागील पंधरा वर्षांपासून दीपक पाठक हे एअर इंडियामध्ये नोकरीला आहेत. त्याचे कुटुंब कात्रप भागातील रावल कॉम्प्लेक्समध्ये अनेक वर्षांपासून राहत आहेत. आमचा देवावर पूर्ण विश्वास असून आम्ही दीपक यांच्या बाबतीत आशावादी आहोत असे त्यांच्या दोन्ही बहिणींनी म्हटले आहे. विमानाला अपघात झाल्याची माहिती समजताच केबिन क्रू एक्झिक्यूटिव्ह दीपक पाठक यांच्या घराकडे शेजाऱ्यांसह स्थानिक सामाजिक कार्यकर्त्यांनी धाव घेतली.

Air India flight AI 171 विमानाचा अहमदाबादमध्ये अपघात झाला. या विमानात १६९ भारतीय प्रवासी, ५३ ब्रिटीश प्रवासी, ७ पोर्तग्रीज प्रवासी आणि १ कॅनेडियन प्रवासी होते. याशिवाय विमानात १० कॅबिन क्रूसह २ पायलट होते. गुजरातचे माजी मुख्यमंत्री विजय रुपाणी देखील या विमानात असल्याची माहिती समोर आली आहे.

दुपारी एकच्या सुमारास विमान दुर्घटना घडली. विमान अहमदाबादच्या मेघानीनगरमधील सिव्हिल रुग्णालयाच्या डॉक्टरांच्या हॉस्टेलवर कोसळले. हॉस्टेलमधील इंटर डॉक्टर्सना दुखापत झाल्याचेही म्हटले जात आहे. विमान कोसळल्याने हॉस्टेलची इमारती कोलमडली. अपघाताच्या दरम्यान भीषण आग लागली. अग्निशमन दल, आपत्कालीन पथकांनी घटनास्थळी दाखल होत बचावकार्याला सुरुवात केली.