Badlapur Brothers Death: फार्म हाऊसवर विजेच्या धक्क्याने २ चुलत भावांचा मृत्यू, वाचवायला गेलेला तिसरा भाऊ थोडक्यात बचावला

अजय दुधाणे, बदलापूर

Badlapur News: बदलापूरमध्ये (Badlapur) दोन चुलत भावांचा विजेचा धक्का लागल्यामुळे दुर्दैवी मृत्यू झाल्याची घटना समोर आली आहे. बदलापूरच्या ग्रामीण भागातल्या वांगणीजवळील ढवळेगावात ही घटना घडली आहे. शनिवारी सायंकाळच्या सुमारास ही घटना घडली. या दोन भावांचा वाचवण्यासाठी गेलेला तिसरा भाऊ थोडक्यात बचावला आहे. या घटनेमुळे ढवळे गावावर शोककळा पसरली आहे.

मिळालेल्या माहितीनुसार, वांगणीजवळील ढवळे गावात बदलापूरमधील ममता हॉस्पिटलचे मालक राठोड यांचे फार्म हाऊस आहे. या फार्म हाऊसमध्ये विजेचा धक्का लागून दोन सख्ख्या चुलत भावांचा दुर्दैवी मृत्यू झाला. जयेश बैकर (वय 19 वर्षे) आणि त्याचा चुलत भाऊ कुमार बैकर (वय 17 वर्षे) अशी मृत्यू झालेल्या मुलांची नावं आहेत.

जयेश हा फॉर्म हाऊसमधील कोंबड्यांच्या खुराड्याचा दरवाजा उघडण्यासासाठी गेला होता. मात्र या दरवाजामध्ये विद्युत प्रवाह उतरल्याने त्याला विजेचा जोरदार धक्का लागला. जयेशला वाचवण्यासाठी त्याचा सख्खा चुलत भाऊ कुमार गेला. पण त्याला देखील विजेचा धक्का लागला. या घटनेत दोघांचा जागीच मृत्यू झाला. या दोघांना पाहण्यासाठी गेलेल्या त्यांच्या तिसऱ्या चुलत भावाला विजेचा सौम्य धक्का लागला. त्यामुळे तो थोडक्यात बचावला.

या घटनेत मृत्यू झालेल्या कुमार बैकरच्या वडिलांनी ढवळे गावात फार्म हाऊस चालवयाला घेतले आहे. ते या फार्म हाऊसच्या देखरेखीचे आणि साफसफाईचे काम करतात. या फार्म हाऊसमध्येच काम करत असताना कोंबड्यांच्या खुराड्याचा दरवाजात विद्युत प्रवाह उतरल्याने दोन भावांचा मृत्यू झाला. त्यांच्या मृत्यूमुळे बैकर कुटुंबीयांवर आणि गावावर शोककळा पसरली आहे. तर आसपासच्या गावांमध्ये हळहळ व्यक्त केली जात आहे.