माधव सावरगावे, साम टीव्ही
छत्रपती संभाजीनगर: पैठण तालुक्यातील बिडकीन पोलिस ठाणे हद्दीतील लाखेगाव येथे शेतात पाणी भरण्यासाठी गेलेल्या एका नवतरुण शेतकऱ्याचा करंट लागून मृत्यू झाल्याची दुर्दैवी घटना उघडकीस आली आहे. ही घटना शनिवारी (ता. ४) मध्यरात्रीच्या सुमारास घडली असून रविवारी (ता. ५) पहाटे हा प्रकार समोर आला. या घटनेमुळे संपूर्ण गावात हळहळ व्यक्त केली जात आहे.
जमिल उमर शेख (वय २९, रा. अलीपुर, लाखेगाव) असे मृत तरुण शेतकऱ्याचे नाव आहे. मिळालेल्या माहितीनुसार, जमिल शेख हे शनिवारी मध्यरात्रीच्या सुमारास त्यांच्या शेतातील गट क्रमांक ४२ मध्ये कांदा पिकाला पाणी देण्यासाठी गेले होते. त्यानंतर ते घरी परतले नाहीत.
रविवारी पहाटे त्यांच्या नातेवाईकांनी शोध घेतला असता ते शेतातच मृत अवस्थेत आढळून आले. शेजारील गट क्रमांक ०५ मध्ये मका पिकाभोवती तारेचे कुंपण करून त्यामध्ये विद्युत प्रवाह सोडण्यात आला होता. अंधारात काम करत असताना त्या कुंपणाचा स्पर्श झाल्याने जमिल शेख यांना जोराचा विद्युत धक्का बसून त्यांचा जागीच मृत्यू झाल्याचा प्राथमिक अंदाज व्यक्त करण्यात येत आहे.
घटनेची माहिती मिळताच बिडकीन पोलिसांनी तात्काळ घटनास्थळी धाव घेत पंचनामा केला. नातेवाईकांच्या मदतीने जमिल शेख यांना ग्रामीण रुग्णालय बिडकीन येथे दाखल करण्यात आले. मात्र वैद्यकीय अधिकारी डॉ. आस्मा यांनी तपासणी करून त्यांना मृत घोषित केले. या प्रकरणी अकस्मात मृत्यूची नोंद करण्यात आली असून पुढील तपास सुरू आहे.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.