Dhananjay Munde: बीडचा आका कोण? सुरेश धस यांच्या दाव्याने धनंजय मुंडेंच्या अडचणी वाढणार?

भरत मोहळकर, साम प्रतिनिधी

सरपंच संतोष देशमुख हत्या प्रकरणानंतर बीडच्या आकावर आरोप-प्रत्यारोप सुरु आहेत.. मात्र हा बीडचा आका कोण? हे भाजप आमदार सुरेश धस यांनीच स्पष्ट केलंय. नेमकं काय म्हणाले आहेत सुरेश धस? यावरचा हा स्पेशल रिपोर्ट. सरपंच संतोष देशमुख हत्या प्रकरणात आमदार सुरेश धस यांच्याकडून वारंवार बीडच्या आकाचा उल्लेख केला जात होता.

बीडचा आका कोण? याबाबत धस यांनी कुणाचंही नाव घेतलं नव्हतं. आकाचे आका हे मंत्रिमंडळात असल्याचं सांगत धस मुंडेंवर अप्रत्यक्ष निशाणा साधत होते.. मात्र पहिल्यांदाच साम टीव्हीच्या मुलाखतीत धस यांनी धनंजय मुंडे हे बीडचे मोठे आका असल्याचा उल्लेख करत खळबळ उडवून दिलीय. एवढंच नाही तर वाल्मिक कराडांनी धनंजय मुंडेंना फोन केले असतील तर त्यांच्या अडचणी वाढणार असल्याचा इशाराही धस यांनी दिलाय.

सत्ताधारी आणि विरोधी पक्षाचे आमदारांकडून धनंजय मुंडेंच्या हकालपट्टीची मागणी जोर धरत आहे. मात्र अजित पवारांच्या राष्ट्रवादीने धनंजय मुंडेंचा बचाव केलाय. सीआयडीने वाल्मिक कराडला अटक केलीय. त्यातच सत्ताधारी भाजपचे आमदार सुरेश धस यांनी कराड हे छोटे आका तर धनंजय मुंडे हे बीडचे मोठे आका असल्याचा थेट उल्लेख केलाय.. त्यामुळे कराडनंतर सीआयडी आपला मोर्चा मंत्री धनंजय मुंडेंकडे वळवणार का? आणि मुंडेंची चौकशी करणार का? याकडे राज्याचं लक्ष लागलंय.