Nawab Malik News : नवाब मलिकांनी अजित पवारांना पाठिंबा दिल्याची चर्चा, पण...

Mumbai News : राष्ट्रवादी काँग्रेसच्या अनेक बड्या नेत्यांनी अजित पवारांच्या नेतृत्वात बंड करत शिंदे-फडणवीस सरकारला पाठिंबा दिला आहे. अजित पवारांनी २ फेब्रुवारीला राज्याच्या उपमुख्यमंत्रीपदाची शपथही घेतली आहे. तसेच राष्ट्रवादीच्या ८ आमदारांनीही मंत्रिपदाची शपथ घेतली आहे.

सध्या मिळत असलेल्या माहितीनुसार जवळपास ३५ ते ४० आमदारांचं अजित पवारांचं समर्थन आहे. मात्र याबाबत ठोस आकडा अजून समोर आलेला नाही. या सर्व घडामोडींदरम्यान अजित पवारांना समर्थन केलेल्या आमदारांच्या यादीत माजी मंत्री नवाब मलिक यांचं देखील नाव असल्याची चर्चा होती. (Political News)

मात्र मिळालेल्या माहितीनुसार, नवाब मलिक यांनी तटस्थ राहण्याची भूमिका घेतली आहे. न्यायलयीन कोठडीत असलेल्या नवाब मलिक यांच्याशी सुप्रिया सुळे आणि अजित पवार दोघांनी संपर्क साधला होता. दोन्ही गटाकडून त्यांना विचारणा झाली होती. पण नवाब मलिक तटस्थ असून त्यांनी कोणतीही भूमिका घेतली नसल्याची माहिती आहे.

नवाब मलिकांवर आरोप काय?

नवाब मलिक यांच्यावर दाऊद इब्राहिमशी संबंधित व्यक्तीकडून जमीन खरेदी केल्याचा आरोप आहे. यामध्ये मनी लॅड्रींग केल्याच्या आरोपाखाली नवाब मलिक यांना अटक करण्यात आली आहे. सध्या ते न्यायालयीन कोठडीत आहेत. मात्र तब्येत बिघडल्याने त्यांच्यावर न्यायालयाच्या परवानगीने खाजगी रुग्णालयात उपचार सुरू आहेत.  (Latest Marathi News)

कोणत्या मंत्र्यांनी शपथ घेतली

अजित पवार यांनी रविवारी राज्याचे नवे उपमुख्यमंत्री म्हणून शपथ घेतली. त्यांच्यासोबत छगन भुजबळ, दिलीप वळसे पाटील, हसन मुश्रीफ, धनंजय मुंडे, धर्मराव बाबा अत्राम, आदिती तटकरे, संजय बनसोडे आणि अनिल पाटील यांनीही शपथ घेतली.