Washim News : तर भाजपचे काम करणार नाही; शिवसेनेचा भाजपला इशारा

मनोज जयस्वाल 

वाशीम : एकीकडे भाजप बंडखोरांवर मोठ्या प्रमाणात कारवाई होत असताना दुसरीकडे वाशिमच्या रिसोड मतदारसंघात भाजपचे बंडखोर उमेदवारावर कारवाई करण्याची मागणी शिवसेना शिंदे गटाने केली आहे. असे न केल्यास दोन मतदारसंघात भाजपचे काम करणार नसल्याचा इशारा शिवसेनेने भाजपला दिला आहे.

विधानसभा निवडणुकीत अनेक मतदारसंघात बंडखोरी झाली आहे. दरम्यान राज्यात वेगवेगळ्या मतदारसंघात बंडखोरी करणाऱ्या भाजपच्या ४० पदाधिकाऱ्यांवर भाजपने कारवाई केली आहे. याच दरम्यान (Washim) वाशिमच्या रिसोड मतदारसंघात भाजपचे बंडखोर अनंतराव देशमुख यांच्यावर कारवाई न झाल्याने शिवसेनेच्या शिंदे गटाने कारवाई करण्याची मागणी केली. कारवाई न झाल्यास इतर दोन मतदारसंघात (BJP) भाजपचे काम करणार नसल्याचा इशारा शिवसेनेच्या पदाधिकाऱ्यांनी वाशिम येथे पत्रकार परिषदेतून दिला आहे.

फडणवीसांनी भूमिका स्पष्ट करावी 
तसेच भाजपचे बंडखोर उमेदवार हे देवेंद्र फडणवीस यांचे नाव घेऊन प्रचार करत आहेत. त्यांच्या व्हिडिओ क्लिपचा वापर करत आहेत. या संदर्भात देवेंद्र फडणवीस यांनीच भूमिका स्पष्ट करावी; असेही आवाहन शिवसेना शिंदे गटाचे जिल्हाप्रमुख महादेव ठाकरे आणि विजय खानजोडे यांनी केला आहे.